तान्जानियामा विवादास्पद आम निर्वाचनपछि भड्किएको हिंसामा ७०० भन्दा बढी मानिसको मृत्यु भएको दाबी गरिएको छ।

विपक्षी दल ‘चडेमा’ (CHADEMA) ले शुक्रबार देशभर भएका झडपहरूमा सयौं मानिस मारिएको जनाएको छ। तर, संयुक्त राष्ट्रसंघले विश्वसनीय स्रोतहरूलाई उद्धृत गर्दै हालसम्म १० जनाको मृत्यु मात्र पुष्टि गरेको छ।

चडेमाका प्रवक्ता जोन किटोकाका अनुसार केवल दार–एस–सलाममा करिब ३५० र म्वान्जा क्षेत्रमा २०० भन्दा बढी मानिस मारिएका छन्। अन्य क्षेत्रका घटनासमेत जोड्दा मृत्यु संख्या लगभग ७०० पुग्ने उनले दाबी गरेका छन्। उनका अनुसार यो तथ्यांक पार्टीले विभिन्न अस्पताल भ्रमणपछि संकलन गरेको हो।

सरकारद्वारा अत्यधिक बल प्रयोगको खण्डन

सरकारले भने हालसम्म कुनै आधिकारिक तथ्यांक सार्वजनिक गरेको छैन। तान्जानियाका विदेशमन्त्री महमूद थाबित कोम्बोले अत्यधिक बल प्रयोग गरिएको आरोप अस्वीकार गरेका छन्। अल जजिरासँगको अन्तर्वार्तामा उनले प्रदर्शनकारीहरूको मृत्युबारे सरकारसँग कुनै प्रमाणित जानकारी नभएको बताए।

“हाल कुनै पनि अत्यधिक बल प्रयोग गरिएको छैन। मैले ती ७०० मानिस कतै देखेको छैन,” मन्त्री कोम्बोले भने, “अहिलेसम्म कुनै पनि प्रदर्शनकारीको मृत्युको पुष्टि भएको छैन।”