श्रीलङ्काका राष्ट्रपति अनुराकुमार दिसानायकले देशभर भइरहेको भीषण वर्षा, बाढी र प्राकृतिक प्रकोपको मध्यनजर सार्वजनिक आपतकाल घोषणा गरेका छन्। सार्वजनिक सुरक्षा अध्यादेश अन्तर्गत लागू भएको यो आपतकालले सरकारलाई राष्ट्रव्यापी रूपमा आपतकालीन नियम लागू गर्ने अधिकार प्रदान गर्छ। सरकारका अनुसार निर्णयको उद्देश्य सार्वजनिक सुरक्षाको रक्षा र राष्ट्रिय स्थिरता कायम राख्नु रहेको छ ।

यससँगै राष्ट्रपति दिसानायकले प्रहरी महानिरीक्षक (आईजीपी) को प्रत्यक्ष पर्यवेक्षणमा प्रहरी मुख्यालयमा विशेष अपरेसन युनिट गठन गरिएको जानकारी दिएका छन्। उक्त युनिटले सर्वसाधारणका लागि ल्यान्डलाइन र ह्वाट्सएप हटलाइन सञ्चालनमा ल्याइएको छ।

देशभरका प्रहरी अधिकारीहरूलाई उनीहरूको डिभिजनभित्र मौसम सम्बन्धित जोखिम व्यवस्थापनका लागि द्रुत प्रतिक्रिया टोली परिचालन गरिएको छ। डुंगा, उद्धार सामग्री तथा अन्य उपकरणहरू तत्काल तैनाथ भइरहेका छन्। विपद् व्यवस्थापन केन्द्र, सशस्त्र बल तथा अन्य सरकारी निकायहरूलाई संयुक्त रूपमा आपतकालीन अपरेसनमा समन्वय गरिएको प्रहरीले जनाएको छ।

अधिकारीहरूका अनुसार बाढीपीडितका घर तथा सम्पत्तिको सुरक्षाका लागि विशेष उपाय अपनाइएको छ। अस्थायी आश्रयस्थलमा बसिरहेको जनताको सुरक्षा सुनिश्चित गर्न प्रहरीलाई अतिरिक्त निर्देशन दिइएको छ।

विदेशी नागरिकका लागि विशेष भिसा सुविधा

अध्यागमन तथा आप्रवासन विभागले खराब मौसमका कारण फसेका विदेशी नागरिकका लागि विशेष भिसा सुविधा शुरू गरेको छ। नोभेम्बर २८ पछि प्रस्थान गर्न नसकेका यात्रुहरूलाई भिसा विस्तार शुल्क तथा पेनाल्टी छुट दिइनेछ। पर्यटक, व्यवसायिक तथा निवास भिसा हुनेहरूलाई अतिरिक्त ७ दिन समय प्रदान गरिएको छ। भिसा अनलाइनबाटै थप गर्न सकिने र आवश्यक अद्यावधिक जानकारी क्रमशः जारी गरिने विभागले जनाएको छ।

आज सम्म १२३ जनाको मृत्यु, १३० बेपत्ता

दित्वा चक्रवातपछि श्रीलङ्कामा लगातार परेको भारी वर्षा र बाढीका कारण हालसम्म १२३ जनाको मृत्यु भएको छ भने १३० जना अझै बेपत्ता छन्। विपद् व्यवस्थापन केन्द्रका महानिर्देशक सम्पत कोटुवेगोदाका अनुसार ४३ हजार ९९५ जनालाई घर क्षतिग्रस्त भएपछि राज्य सञ्चालित राहत केन्द्रमा सारिएको छ।

भारी वर्षा सोमबारदेखि सुरु भएको थियो, बुधबार वर्षा थप तीव्र भएपछि स्थिति गम्भीर बनेको हो । केलानी नदीको तटबन्ध भाँचिएपछि हजारौँ बासिन्दालाई अस्थायी शिविरमा सार्नुपरेको थियो।

देशका अधिकांश भागमा वर्षा कम भए पनि उत्तरतर्फका केही क्षेत्रमा अझै पानी परिरहेको अधिकारीहरूले जनाएका छन्। जोखिम अझै उच्च भएकाले सतर्कता अपनाउन आग्रह गरिएको छ।

सन् २००० पछि श्रीलङ्कामा आएको सबैभन्दा ठूलो बाढी सन् २००३ को जुनमा आएको थियो, जसमा २५४ जनाको मृत्यु भएको थियो।