अमेरिका बसाइँलाई विश्राम दिँदै ‘ड्युक एन्ड डचेस अफ ससेक्स’ अर्थात् राजकुमार ह्यारी र मेगन मार्कल पुनः बेलायत फर्किने भएका छन्।

प्राप्त समाचारअनुसार, यो जोडी यसै महिनाको अन्त्यसम्ममा लन्डनबाहिरको एक गैर-राजकीय (निजी) निवासमा सर्ने तयारीमा छ। उनीहरूका सात वर्षीय छोरा आर्ची र पाँच वर्षीया छोरी लिलिबेटलाई आगामी सेप्टेम्बरदेखि बेलायतकै विद्यालयमा भर्ना गराउने योजनासमेत तय भएको छ।

ह्यारी र मेगनको यो निर्णयबारे गत आइतबार मात्रै राजा चार्ल्सलाई जानकारी गराइएको थियो। यद्यपि, बेलायत फर्किए पनि उनीहरू पुनः राजकीय जिम्मेवारीमा फर्किने कुनै सम्भावना छैन। उनीहरूको आधिकारिक हैसियतमा कुनै परिवर्तन हुने छैन र उनीहरू आम सर्वसाधारण (निजी नागरिक) कै रूपमा रहनेछन्। यस विषयमा ‘प्रिन्स एन्ड प्रिन्सेस अफ वेल्स’ (राजकुमार विलियम र केट) लाई पनि जानकारी गराइसकिएको छ।

ह्यारी र मेगनले सन् २०२० को सुरुवातमै राजकीय जिम्मेवारी त्याग्दै सोही वर्षको मार्चमा अमेरिकाको क्यालिफोर्निया बसाइँ सरेका थिए। त्यसयता राजपरिवारसँग उनीहरूको सम्बन्ध निकै चिसिएको थियो। यसअघि गत जुलाईमा ह्यारी दम्पतीले आफ्ना बालबच्चासहित राजा चार्ल्सलाई उनको हाइग्रोभस्थित निजी निवासमा भेटेका थिए।

ग्लुचेस्टरसायरमा भएको उक्त भेटघाटलाई बिग्रिएको सम्बन्ध सुधारको महत्त्वपूर्ण कडीका रूपमा हेरिएको छ। बकिङ्गम दरबारले उक्त भेटलाई ‘निजी पारिवारिक अवसर’ भनेको थियो, जहाँ राजा चार्ल्सले चार वर्षभन्दा बढी समयपछि आफ्ना नातिनातिनालाई प्रत्यक्ष भेट्न पाएका थिए। सन् २०२२ मा महारानी एलिजाबेथ द्वितीयको अन्त्येष्टिमा सहभागी भएयता यो जोडी एकसाथ बेलायत आएको थिएन।

जुलाईको उक्त भेटमा बेलायत सर्ने विषयमा भने कुनै छलफल नभएको बुझिएको छ। गत सप्ताहान्तसम्म पनि राजा चार्ल्स यस कदमबारे अनभिज्ञ थिए। यद्यपि, आफ्ना नातिनातिनासँग अब नियमित रूपमा समय बिताउन पाउने अवसरलाई लिएर उनी निकै खुसी र सकारात्मक रहेको बताइएको छ।

ह्यारी र मेगनका लागि बेलायतमा सुरक्षा व्यवस्था सधैँ विवाद र चिन्ताको विषय बन्दै आएको छ। बेलायती प्रहरीबाट सुरक्षा पाउनुपर्ने ह्यारीको माग अस्वीकृत भएपछि गत जुलाईको भ्रमणसमेत रद्द हुने जोखिम बढेको थियो। राजकीय जिम्मेवारी छाडेपछि आफ्नो सुरक्षा स्तर घटाइएको निर्णयविरुद्ध ह्यारीले दायर गरेको कानुनी मुद्दा गत वर्ष मात्रै हारेका थिए।

उपयुक्त सुरक्षाको अभावकै कारण आफूले श्रीमती र बालबच्चालाई बेलायत ल्याउन नसकेको गुनासो ह्यारीले गर्दै आएका थिए। यता गृह मन्त्रालयले भने राजपरिवारको सुरक्षासम्बन्धी निर्णय विशेषज्ञ समितिले गर्ने स्पष्ट पार्दै बेलायतको सुरक्षा व्यवस्था ‘भरपर्दो’ रहेको दाबी गरेको छ।

अर्कोतर्फ, मिडियाले आफ्नो व्यक्तिगत जीवनमा अनावश्यक हस्तक्षेप गरेको भन्दै ह्यारी क्रुद्ध छन्। गत जनवरीमा अदालतसमक्ष बयान दिने क्रममा उनले बेलायती प्रेसलाई लक्षित गर्दै भनेका थिए, "उनीहरूले मेरी श्रीमतीको जीवन पूरै कष्टकर बनाइदिएका छन्।"

यसैबीच, जुलाई भ्रमणका क्रममा ह्यारीले ‘इन्भिक्टस गेम्स’ को प्रवर्द्धन गरेका थिए, जुन अर्को वर्ष बर्मिङ्घममा आयोजना हुँदै छ। इन्भिक्टस गेम्स फाउन्डेसनका प्रमुख कार्यक्रम अधिकृत डेभिड वाइजम्यानले ह्यारी सधैँका लागि बेलायत फर्किनुलाई ‘उत्कृष्ट खबर’ भन्दै खुसी व्यक्त गरेका छन्।