चिनियाँ राष्ट्रपति सी जिनपिङ सेप्टेम्बर १२ र १३ मा भारतको नयाँ दिल्लीमा आयोजना हुने १८औँ ब्रिक्स शिखर सम्मेलनमा सहभागी हुने भएका छन्। चिनियाँ विदेश मन्त्रालयका प्रवक्ताले बिहीबार राष्ट्रपति सीको भारत भ्रमणबारे जानकारी दिएका हुन्।

गत दुई दशकमा ब्रिक्स उदीयमान तथा विकासशील राष्ट्रहरूबीच सहकार्यको महत्वपूर्ण मञ्चका रूपमा विकसित भएको छ। विश्व मामिलामा समेत ब्रिक्सको भूमिका निरन्तर विस्तार हुँदै गएको चीनले जनाएको छ।

चीनले आफूलाई ब्रिक्सको दृढ समर्थक तथा सक्रिय सहभागीका रूपमा प्रस्तुत गर्दै आएको छ। खुलापन, समावेशिता, पारस्परिक लाभ र सहकार्यको भावनालाई आत्मसात् गर्दै साझेदार राष्ट्रहरूसँग साझा विकासलाई अघि बढाइरहेको चिनियाँ विदेश मन्त्रालयको भनाइ छ।

आगामी शिखर सम्मेलनमा राष्ट्रपति सीले अन्य सदस्य राष्ट्रका नेताहरूसँग ब्रिक्स सहकार्यलाई अझ उच्च गुणस्तरीय रूपमा अघि बढाउने नयाँ मार्गचित्रबारे छलफल गर्ने कार्यक्रम छ। साथै, सम्मेलनमा सहभागी विभिन्न देशका नेताहरूसँग द्विपक्षीय भेटवार्ता पनि गर्ने अपेक्षा गरिएको छ।

ग्लोबल साउथको सामूहिक शक्ति अभिवृद्धि गर्दै तीव्र परिवर्तनको सामना गरिरहेको विश्वमा स्थिरता र सकारात्मक गति प्रदान गर्न ब्रिक्सले महत्वपूर्ण भूमिका निर्वाह गर्ने चीनको विश्वास छ।