हाल नेपालको पश्चिमी भूभाग आसपासको उपल्लो वायुमण्डलमा न्यून चापीय प्रणालीका साथै स्थानीय वायुको आंशिक प्रभाव रहेको जल तथा मौसम विज्ञान विभाग, मौसम पूर्वानुमान महाशाखाले जनाएको छ।

यसकै प्रभावका कारण हाल गण्डकी र कर्णाली प्रदेशका हिमाली तथा पहाडी भूभागमा साधारणतया बदली रहेको छ। देशका बाँकी पहाडी भूभागमा आंशिक बदली रहँदा तराई क्षेत्रमा भने मौसम मुख्यतया सफा छ।

दिउँसोको मौसम: पहाडमा वर्षा र चट्याङ, तराईमा तातो हावा (लू)
महाशाखाका अनुसार आज दिउँसो देशको हिमाली र पहाडी भूभागमा साधारणतया बदली रहनेछ भने तराईका भूभागमा आंशिक बदली हुनेछ। यसैगरी, लुम्बिनी र सुदूरपश्चिम प्रदेशसहित देशका हिमाली तथा पहाडी भूभागका थोरै स्थानहरूमा मेघगर्जन र चट्याङसहित हल्कादेखि मध्यम वर्षाको सम्भावना रहेको छ।

यता मधेस प्रदेशका साथै कोशी, बागमती र गण्डकी प्रदेशका तराई भूभागमा भने अत्यधिक गर्मी (तातो दिन) हुने सम्भावना रहेकाले आवश्यक सतर्कता अपनाउन महाशाखाले अनुरोध गरेको छ। 

आज राति कोशी र मधेस प्रदेश लगायत देशका हिमाली भूभागमा साधारणतया बदली रहनेछ। त्यस्तै, पहाडी भूभागमा आंशिक बदली रहँदा बाँकी तराई क्षेत्रमा मौसम मुख्यतया सफा रहनेछ। कोशी र मधेस प्रदेशका साथै बागमती, गण्डकी, लुम्बिनी र कर्णाली प्रदेशको हिमाली तथा पहाडी भूभागका एक-दुई स्थानमा हल्का वर्षाको सम्भावना रहेको महाशाखाले जनाएको छ।