हाल देशभर मनसुनी वायुको प्रत्यक्ष प्रभाव रहनुका साथै मनसुनको न्यून चापीय रेखा सरदर स्थानमा अवस्थित रहेको छ।

यसको प्रभावले यतिबेला मधेस र लुम्बिनीका तराई भूभागमा आंशिक बदली रहे पनि देशका बाँकी भूभागमा सामान्यतया बदली भएको छ। मौसम पूर्वानुमान महाशाखाका अनुसार कोशी, बागमती र कर्णालीका केही स्थानहरूका साथै गण्डकी, लुम्बिनी र सुदूरपश्चिमका थोरै स्थानहरूमा हल्कादेखि मध्यम वर्षा भइरहेको छ।

आज दिउँसोको मौसम
दिउँसो देशभर आंशिकदेखि सामान्य बदली रहनेछ। हिमाली तथा पहाडी भूभागका केही स्थानका साथै तराईका थोरै स्थानहरूमा मेघगर्जन र चट्याङ्गसहित हल्कादेखि मध्यम वर्षाको सम्भावना रहेको छ। विशेष गरी कोशी, बागमती, गण्डकी, लुम्बिनी र कर्णाली प्रदेशका पहाडी भूभागका एक-दुई स्थानमा भारी वर्षा हुन सक्ने महाशाखाले जनाएको छ।

आज रातिको मौसम
रातिको समयमा पनि देशभर मौसम सामान्यतया बदली नै रहनेछ। देशका पहाडी भूभागका केही र तराईका थोरै स्थानमा चट्याङ्गसहित मध्यम वर्षाको सम्भावना छ। यस्तै, बागमती र गण्डकी प्रदेशका पहाडी तथा तराई भूभागका एक-दुई स्थानमा भारी वर्षाको जोखिम रहेको छ।

भारी वर्षा र चट्याङ्गको सम्भावना रहेका क्षेत्रमा आवश्यक सतर्कता अपनाउन मौसम पूर्वानुमान महाशाखाले सबैमा अनुरोध गरेको छ।