देशभर अहिले मनसुनी वायुको प्रभाव सक्रिय रहेको छ। विशेषगरी पूर्वी र मध्य नेपालमा यो प्रभाव अझ बढी रहेको मौसम पूर्वानुमान महाशाखाले जनाएको छ। महाशाखाका अनुसार बङ्गलादेशको उत्तर भूभाग र भारतको पश्चिम बङ्गाल आसपासको क्षेत्रमा बनेको न्यून चापीय प्रणालीको आंशिक प्रभाव नेपालमा पनि परेको छ। यसले गर्दा देशको पूर्वी र मध्य भागमा मौसममा उल्लेख्य परिवर्तन देखिएको छ।

पूर्वी र मध्य भूभागमा साधारण बदली महाशाखाले दिएको पछिल्लो विवरण अनुसार, हाल कोशी, मधेस, र बागमती प्रदेशको पूर्वी भागमा साधारण बदली भएको छ। पहाडी भूभागमा पनि आंशिकदेखि साधारण बदली छ भने अन्य भूभागमा मौसम मुख्यतया सफा रहेको छ। कोशी प्रदेशका केही स्थानहरूमा अहिले नै हल्का वर्षा भइरहेको जानकारी प्राप्त भएको छ।

दिउँसोको मौसम 

आज दिउँसो, देशको पूर्वी भागका विभिन्न स्थानमा आंशिकदेखि साधारण बदली हुने सम्भावना छ। विशेषगरी, कोशी, मधेस, बागमती र गण्डकी प्रदेशमा हल्का देखि मध्यम वर्षा हुन सक्छ। केही स्थानमा चट्याङ्गसहित वर्षा हुने सम्भावना रहेकोले सतर्क रहन मौसम विभागले सुझाव दिएको छ। बाँकी भूभागमा मौसम आंशिक बदली भए पनि सफा नै रहने सम्भावना छ।

रातिको अवस्था

आज राति पनि देशभर आंशिकदेखि साधारण बदली रहिरहने छ। कोशी, मधेस, बागमती, गण्डकी र लुम्बिनी प्रदेशका थोरै स्थानहरूमा चट्याङ्गसहित हल्का देखि मध्यम वर्षाको सम्भावना रहेको महाशाखाले जनाएको छ। अन्य प्रदेशका एक–दुई स्थानमा पनि हल्का वर्षा हुन सक्ने अनुमान गरिएको छ।

वर्षा र चट्याङ्गबाट सावधानी मौसमविद्हरूले विशेषगरी पूर्वी र मध्य भागमा रहेका नागरिकलाई सावधानी अपनाउन आग्रह गरेका छन्। खासगरी चट्याङ्गको सम्भावनालाई ध्यानमा राख्दै खुला ठाउँमा रहनु नपर्ने, विद्युतीय उपकरणहरूको प्रयोगमा सावधानी अपनाउन सुझाव दिइएको छ।