लाओसमा बाढीका कारण गुफाभित्र फसेका सात गाउँलेमध्ये पाँच जनालाई उद्धारकर्ताहरूले बुधबार जीवितै फेला पारेका छन्। यो घटनाले सन् २०१८ मा थाइल्यान्डको गुफामा फसेको किशोर फुटबल टोलीको नाटकीय एवं चुनौतीपूर्ण उद्धारको सम्झना गराएको छ।

विज्ञ गोताखोरहरूको टोलीले उनीहरूलाई लाओसको मध्य प्रान्त साइसोम्बुनस्थित भूमिगत गुफाभित्र फेला पारेको हो। उद्धार टोलीले बाँकी दुई जनाको खोजी कार्यलाई तीव्र बनाएको छ।

उद्धार कार्यमा खटिएका थाई गोताखोर केङकाड बोङकावोङले सामाजिक सञ्जाल फेसबुकमार्फत स्थानीय समयअनुसार दिउँसो ४:३० बजे पाँच जना सुरक्षित फेला परेको र बाँकी दुई जनाको खोजी भइरहेको पुष्टि गरेका छन्। लाओसको उद्धार समूह ‘रेस्क्यु भोलिन्टियर फर पिपल’ ले पनि फेला परेका पाँचै जना जीवित र सुरक्षित रहेको जनाएको छ।

पाँच जना जीवितै भेटिएको खबर सार्वजनिक भएसँगै जमिनमाथि रहेका उद्धारकर्मीहरूले खुसीयाली मनाएका छन्। सामाजिक सञ्जालमा सार्वजनिक भिडियोहरूमा उनीहरू भावुक बन्दै एकअर्कालाई अँगालो हालेर रोएको देखिन्छ।

उद्धार अभियानमा सहभागी फिनल्यान्डका गोताखोर मिको पासीले इन्स्टाग्राममा लेख्दै यो सफलतामा खुसी व्यक्त गरेका छन्। उनले भनेका छन्, “अहिलेसम्मको प्रक्रिया निकै जटिल थियो र यसमा संलग्न सबैले अद्भुत काम गरेका छन्।”

तर, उनले यसलाई ‘क्षणिक राहत’ मात्र भएको बताएका छन्, किनभने फेला परेका व्यक्तिहरू अझै गुफाभित्रै छन् र उनीहरूलाई बाहिर निकाल्न बाँकी नै छ। “सबैजना स्वस्थ र उत्साहित छन्, तर उनीहरूलाई सुरक्षित रूपमा बाहिर निकाल्ने काम अझै बाँकी छ, जुन सहज छैन,” पासीले थपे।

उनका अनुसार गोताखोरहरूको टोली पुनः गुफाभित्र पसेर फसेकाहरूलाई थप खाद्य सामग्री र आवश्यक सामान पुर्‍याउने तयारीमा छ, ताकि उनीहरूले बाहिर निस्कने कठिन यात्राका लागि शारीरिक शक्ति सङ्कलन गर्न सकून्।

पासीले खिचेको भिडियोमा उद्धारकर्मीहरूले गाउँलेहरूको स्वास्थ्य अवस्थाबारे सोधपुछ गरिरहेको देखिन्छ। गाउँलेहरूले आफूहरू बिरामी नभए पनि लामो समयदेखि भोकै रहेकाले निकै कमजोर भएको बताएका छन्। भिडियोमा उद्धारकर्ताहरूले उनीहरूलाई “नरोऊ, नरोऊ” भन्दै सान्त्वना दिइरहेको सुनिन्छ।

गोताखोर बोङकावोङले सिएनएनसँग कुरा गर्दै फसेका गाउँलेहरूको प्रारम्भिक स्वास्थ्य परीक्षण गरी तत्कालका लागि तरल र झोलयुक्त खाना उपलब्ध गराइने जानकारी दिए। त्यसपछि मात्र उनीहरूलाई सुरक्षित बाहिर निकाल्ने ठोस योजना बनाइनेछ।

३४० मिटर लामो साँघुरो सुरुङको चुनौती

यो उद्धार कार्य निकै चुनौतीपूर्ण मानिएको छ। उद्धार समन्वय गरिरहेको ‘मेट्टा थाम कालासिन कमान्ड एन्ड कन्ट्रोल सेन्टर’ का अनुसार उद्धार टोली फसेका व्यक्तिहरूसम्म पुग्न करिब ३४० मिटर लामो सुरुङ पार गर्नुपरेको थियो। सुरुङका कतिपय भागहरू मात्र २३ इन्च चौडा अर्थात् अत्यन्तै साँघुरा छन्।

एक उद्धारकर्मीका अनुसार कतिपय ठाउँमा अगाडि बढ्नका लागि उनले आफ्नो ढाडमा भिरेको अक्सिजन उपकरणसमेत खोल्नुपरेको थियो। गोप्रो क्यामेराको दृश्यमा उद्धार टोली निकै कष्टका साथ पाँच जनासम्म पुग्न सफल भएको देखिन्छ।

गत बुधबार सुन खोज्नका लागि ती सातै जना पुरुष गाउँले गुफाभित्र पसेका थिए। तर, अचानक मुसलधारे वर्षापछि आएको बाढीले गुफाको बाहिरिने बाटो थुनिएको थियो।

राज्य सञ्चालित ‘लाओ न्युज एजेन्सी’ का अनुसार उनीहरू गुफाभित्र हावाको निरन्तर प्रवाह हुने एक अग्लो चट्टानी भागमा ओत लागेर बसेका कारण जीवित रहन सफल भएका हुन्।

यो ठुलो उद्धार अभियानमा १०० भन्दा बढी जनशक्ति परिचालन गरिएको छ। जसमध्ये १५ जना तिनै अनुभवी गोताखोर तथा विशेषज्ञहरू हुन्, जसले सन् २०१८ मा थाइल्यान्डको थाम लुआङ गुफाबाट १२ जना किशोर र उनीहरूका फुटबल प्रशिक्षकको सफल उद्धार गरेका थिए।