म्याग्दी जिल्लाको मालिका गाउँपालिका-६ छ्यारछ्यारेमा म्याग्दी नदीले बगाउँदा ८ वर्षीय बालक बेपत्ता भएका छन्। शुक्रबार साँझ सवा ५ बजे मालिका गाउँपालिका-६ छ्यारछ्यारे र निस्कोट जोड्ने झोलुहङ्गे पुल नजिक पौडी खेल्न गएका बालकलाई नदीले बगाएको हो।

जिल्ला प्रहरी कार्यालयका अनुसार बालक सागर पटेलका छोरा सलमान पटेललाई नदीले बगाएको पुष्टि भएको छ। घटनास्थलमा बालकका चप्पल र कपडा फेला परेको थियो। भारी वर्षाका कारण शुक्रबार खोजी गर्न सम्भव नभए पनि शनिबार बिहानैदेखि इलाका प्रहरी र अन्य प्रहरी चौकीबाट टोली परिचालन गरी खोजी सुरु गरिएको छ।

प्रहरी निरीक्षक सागर पौडेलका अनुसार खोजीकार्य म्याग्दी नदीको किनार क्षेत्रहरूमा जारी छ।