मुलुकभरका सामुदायिक विद्यालयहरूमध्ये ४ हजारभन्दा बढी विद्यार्थी संख्या भएका ठूला विद्यालयमा रूपन्देही जिल्ला अग्रस्थानमा देखिएको छ। देशभर ४ हजारभन्दा बढी विद्यार्थी संख्या भएका ९ वटा ठूला सामुदायिक विद्यालय रहेकामा ३ वटा विद्यालय रूपन्देहीकै मात्र छन्।

शिक्षा, विज्ञान तथा प्रविधि मन्त्रालयका अनुसार रूपन्देहीको बुटवल उपमहानगरपालिकास्थित कालिका मानवज्ञान माध्यमिक विद्यालयमा देशभरिमै सबैभन्दा बढी ८ हजार २ सय ३९ जना विद्यार्थी अध्ययनरत् छन्। रूपन्देहीकै तिलोत्तमा नगरपालिकाको शान्ति नमूना माविमा ७ हजार १ सय २०, बुटवलकै कान्ति माविमा ६ हजार ३४ र नवीन औद्योगिक कदरबहादुर रीता माविमा ५ हजार ३ सय ४० विद्यार्थी रहेका छन्।

रूपन्देहीपछि काठमाडौँमा धेरै विद्यार्थी भएका सामुदायिक विद्यालय छन्। काठमाडौँ महानगरपालिकाको ज्ञानोदय माविमा ४ हजार ७ सय ४६ र विश्वनिकेतन माविमा ४ हजार ३ सय १ विद्यार्थी छन्।

यस्तै, अन्य जिल्लाका ठूला विद्यालयहरूमा धनुषाको जनता नमूना माविमा ६ हजार २ सय ६६, मोरङको सुकुना माविमा ४ हजार ६ सय ४२, भक्तपुरको वागीश्वरी माविमा ४ हजार १ सय ८५ र कपिलवस्तुको नेपाल आदर्श माविमा ४ हजार १ सय १४ विद्यार्थी रहेका छन्।

अर्थ मन्त्रालयद्वारा प्रकाशित आर्थिक सर्वेक्षण (२०८२/८३) का अनुसार विद्यालय व्यवस्थापन, सबल नेतृत्व, लगानी र गुणस्तर वृद्धिका लागि भएका विभिन्न प्रयासका कारण पछिल्लो समय सामुदायिक विद्यालयतर्फ विद्यार्थीको आकर्षण तीव्र रूपमा बढ्दै गएको हो। हाल देशभर परम्परागतसहित २७ हजार १० वटा सरकारी विद्यालय सञ्चालनमा छन्।