भारतमा कफ सिरप सेवनपछि बालबालिकाको मृत्यु भएका घटनाहरू सार्वजनिक भएपछि नेपाल औषधि व्यवस्था विभागले उत्पादक, वितरक, चिकित्सक र उपभोक्तालाई गम्भीर हुन निर्देशन दिएको छ। विभागले बालबालिकाको ज्यान जोखिममा पार्न सक्ने ‘कोल्ड्रिफ कफ सिरप’ लगायतका खोकीका औषधिबारे विशेष सावधानी अपनाउन आग्रह गरेको हो।

विभागले मंगलबार जारी गरेको सूचनामा भारतमा उत्पादन गरिएका केही कफ सिरपमा इथिलिन ग्लाइकोल र डाइथिलिन ग्लाइकोल नामका विषालु पदार्थ फेला परेका र तिनको सेवनबाट १८ बालबालिकाको मृत्यु भएको जनाएको छ। नेपालमा ‘कोल्ड्रिफ कफ सिरप’ दर्ता नभएको स्पष्ट गर्दै विभागले यस्ता विषाक्त पदार्थ मिसावट भएका औषधिबारे यसअघि पनि चेतावनी जारी गरिएको उल्लेख गरेको छ।

विश्व स्वास्थ्य संगठन (WHO) को वर्किङ डकुमेन्ट अनुसार तरल औषधि उत्पादनमा इथिलिन ग्लाइकोल र डाइथिलिन ग्लाइकोलको मात्रा परीक्षण गर्न निर्देशन दिँदै विभागले उत्पादकहरूलाई कच्चा पदार्थहरू  प्रोपाइलिन ग्लाइकोल, पोलिइथिलिन ग्लाइकोल, सोर्बिटोल र ग्लिसरिन  मान्यताप्राप्त बिक्रेताबाट मात्र खरिद गर्न आदेश दिएको छ। उत्पादन अघि तोकिएको विधिअनुसार परीक्षण गर्नुपर्ने र उत्पादन भइसकेपछि प्रत्येक ब्याचमा विषालु पदार्थको परीक्षण गरेर मात्र बजारमा पठाउनुपर्ने व्यवस्था गरिएको छ।

नेपालमा आयात हुने तरल खोकीका औषधिहरूका प्रत्येक ब्याचमा इथिलिन ग्लाइकोल र डाइथिलिन ग्लाइकोल मिसावट नभएको प्रमाणित गर्न आयातकर्तालाई निर्देशन दिइएको छ। परीक्षणपछि मात्र औषधि आयात र बिक्री गर्न पाइने व्यवस्था गरिएको छ।

फार्मेसी र औषधि पसललाई विभागमा दर्ता भएका औषधिहरू मात्र बिक्री वितरण गर्न र चिकित्सकलाई दर्ता भएका औषधिहरू मात्र सिफारिस गर्न आग्रह गरिएको छ। साथै, दुई वर्ष वा सोभन्दा कम उमेरका बालबालिकालाई खोकीको औषधि सिफारिस गर्दा वैज्ञानिक प्रमाणका आधारमा मात्र गर्न सुझाव दिइएको छ।

विभागले बालबालिकालाई कुनै पनि खोकीको औषधि चिकित्सकको सल्लाहबमोजिम मात्र प्रयोग गर्न, औषधिको लेबलमा उल्लेखित जानकारी ध्यानपूर्वक पढ्न र विभागमा दर्ता भएका औषधि मात्र प्रयोग गर्न उपभोक्तालाई आग्रह गरेको छ।