विशेष सूचनाका आधारमा पर्सा प्रहरीले १४ लाख १३ हजार ५०० रुपैयाँको हुण्डी रकमसहित दुई जनालाई पक्राउ गरेको छ। पक्राउ पर्नेहरूमा वीरगञ्ज–२ घुसुकपुरका ३९ वर्षीय संजय कुमार साह र बारा महागढीमाई–४ बगडमपुरका ४१ वर्षीय शनि कुमार ठाकुर रहेका छन्।
पर्सा प्रहरी प्रमुख एसपी गौतम मिश्रका अनुसार बिहीबार साँझ करिब सवा ४ बजे वीरगञ्ज महानगरपालिका–२, इदगाह चोक सडकखण्डबाट भारतिय नम्बर प्लेट BR05 AB 7761 र प्रदेश २–०३–००२ प ५५४४ नम्बरका मोटरसाइकल रोकी जाँच गर्दा रकम फेला परेको हो। प्रहरीले बताए अनुसार मोटरसाइकलमा फल्स सिलिङ बनाई रकम लुकाइएको अवस्था फेला परेको थियो।
बरामद रकममा १ हजार दरका नोट १० लाख र ५०० दरका नोट ४ लाख १३ हजार ५०० रुपैयाँ रहेको छ।
पक्राउ परेकाहरूलाई नियन्त्रणमा लिएर पर्सा जिल्ला अदालतबाट ५ दिनको म्याद लिएर थप अनुसन्धान भइरहेको प्रहरीले जनाएको छ। उनीहरूमाथि मुलुकी अपराध संहिता २०७४ को दफा १२५(क) अनुसार हुण्डी कारोबारसम्बन्धी कसूरमा कारबाही भइरहेको छ।
तपाईको प्रतिक्रिया दिनुहोस