पोखरा क्षेत्रीय अन्तर्राष्ट्रिय विमानस्थल निर्माणमा भएको अर्बौँको भ्रष्टाचार र अनियमितता मुद्दामा नेपाल नागरिक उड्डयन प्राधिकरण (क्यान) का पूर्वमहानिर्देशक सञ्जीव गौतमलाई विशेष अदालतले पुर्पक्षका लागि जेल पठाउन आदेश दिएको छ।

मंगलबार विशेष अदालतका सदस्यहरू नारायणप्रसाद पौडेल, हेमन्त रावल र डिल्लीरत्न श्रेष्ठको संयुक्त इजलासले गौतमलाई थुनामा राखेर मुद्दाको पुर्पक्ष गर्न आदेश दिएको हो।

पूर्वमहानिर्देशक गौतममाथि विमानस्थल निर्माणका क्रममा ८ करोड ९५ लाख २ हजार ७ सय ८० रुपैयाँ सरकारी रकम हिनामिना गरेको र प्राधिकरणलाई ठुलो हानी नोक्सानी पुर्‍याएको गम्भीर आरोप छ। अख्तियार दुरुपयोग अनुसन्धान आयोगले विमानस्थल निर्माणमा प्राविधिक तथा आर्थिक अनियमितता गरेको दाबीसहित उनीविरुद्ध विशेष अदालतमा मुद्दा दायर गरेको थियो।