बैतडीको शिवनाथ गाउँपालिकाले यस वर्ष लाग्ने जात्राको अवसरमा चार दिनका लागि स्थानीय सार्वजनिक बिदा घोषणा गरेको छ।
शिवनाथ गाउँपालिकास्थित प्रसिद्ध शिवनाथ मन्दिर र देहीगडा भगवती मन्दिरमा लाग्ने धार्मिक तथा सांस्कृतिक जात्रालाई ध्यानमा राख्दै बिदा दिने निर्णय गरिएको गाउँपालिका अध्यक्ष कर्णसिंह साउदले जानकारी दिएका छन् ।
उनका अनुसार अध्यक्षस्तरीय निर्णयबाट कात्तिक ११ र १२ तथा कात्तिक १८ र १९ गते गाउँपालिकाभर सार्वजनिक बिदा हुने छ।
यस अवसरमा शिवनाथ मन्दिरमा नेपालका विभिन्न स्थानका भक्तजन मात्र नभई भारतका सीमावर्ती क्षेत्रका दर्शनार्थीहरू पनि आउने परम्परा रहेको छ ।
स्थानीयवासीहरूका अनुसार यो जात्रा क्षेत्रकै सांस्कृतिक पहिचान र धार्मिक आस्थासँग गहिरो रूपमा जोडिएको उत्सव हो, जसले स्थानीय अर्थतन्त्र र सामाजिक एकता दुवैलाई सुदृढ बनाउने गर्छ।
तपाईको प्रतिक्रिया दिनुहोस