जनमत पार्टीकी लुम्बिनी प्रदेशसभा सदस्य सुमन शर्मा रायमाझीविरुद्ध बैंकिङ कसुरसम्बन्धी मुद्दामा पक्राउ पुर्जी जारी भएको छ। जिल्ला अदालत पर्साले जेठ १६ गते उनको नाममा पक्राउ पुर्जी जारी गरेको हो ।

बर्दियाको गुलरिया नगरपालिका–५ निवासी ४५ वर्षीया रायमाझीलाई पक्राउ गर्न पर्सा प्रहरीले बर्दिया जिल्ला प्रहरी कार्यालयसँग पत्राचार गरिसकेको छ। तर अहिलेसम्म उनी फरार रहेको र खोजी कार्य जारी रहेको बर्दिया प्रहरी प्रवक्ता डिएसपी चक्रडम्मर पालले जानकारी दिए।

रायमाझीविरुद्ध पर्साकी आशाकुमारी चौहानले बैंकिङ कसुर तथा चेक अनादर मुद्दा दायर गरेकी हुन् । चौहान स्वयं पनि जनमत पार्टीकी नेतृ हुन् । कार्यक्रममार्फत चिनजान भएपछि दुबैबीच सम्बन्ध विस्तार भएको र त्यसक्रममा लेनदेन भएको प्रहरीले जनाएको छ ।

अनुसन्धानअनुसार रायमाझीले चौहानसँग साढे ५ लाख रुपैयाँ सापटी लिएकी थिइन् । त्यसको केही रकम फिर्ता गर्ने प्रयासस्वरूप उनले दुई पटक चेक दिएकी थिइन् । तर, भदौमा दिइएको दुई लाख ७५ हजार र अर्को ८० हजार रुपैयाँ बराबरको चेक दुबै बाउन्स भएपछि मुद्दा अघि बढेको हो ।

जिल्ला प्रहरी कार्यालय पर्साका प्रहरी निरीक्षक शैलेन्द्रकुमार खड्काले चेक अनादर तथा बैंकिङ कसुरअन्तर्गत तीन लाख ५५ हजार रुपैयाँको विषयमा पुर्जी जारी भएको पुष्टि गरेका छन् ।

सांसद रायमाझी लुम्बिनी प्रदेश सरकारमा पूर्वमन्त्रीसमेत हुन् । पहिलो कार्यकालमा उनी जनता समाजवादी पार्टी (जसपा) बाट प्रदेशसभा सदस्य निर्वाचित भएकी थिइन् । त्यसबेला शंकर पोखरेल नेतृत्वको सरकारमा भौतिक पूर्वाधार विकास राज्यमन्त्री बनेकी रायमाझीले जसपाले कारबाही प्रक्रिया अघि बढाएपछि पदबाट राजीनामा दिएकी थिइन् ।

त्यसपछि नेकपा (माओवादी केन्द्र) का मुख्यमन्त्री कुलप्रसाद केसी नेतृत्वको सरकारले उनलाई कृषि मन्त्री नियुक्त गरेको थियो । पछिल्लो प्रदेशसभा निर्वाचनको अन्तिम चरणमा जसपा परित्याग गर्दै उनले जनमत पार्टी प्रवेश गरेकी थिइन् । समानुपातिक सूचीबाट सांसद बनेकी रायमाझी अहिले जनमत पार्टीका तर्फबाट लुम्बिनी प्रदेशसभा सदस्यका रूपमा रहेका छन्।