ब्रिक्स समूहका देशहरूको संयुक्त कूल गार्हस्थ्य उत्पादन (GDP) ६०० खर्ब अमेरिकी डलरभन्दा बढी पुगेको छ। रुसी राष्ट्रपति भ्लादिमिर पुटिनले मस्कोमा आयोजित ब्रिक्स व्यापार मञ्चमा यस तथ्यलाई प्रस्ट पार्दै, ब्रिक्सले विश्व अर्थतन्त्रमा महत्त्वपूर्ण भूमिका खेलेको र भविष्यमा यसको भूमिका अझै बढ्ने उल्लेख गर्नुभयो।

उहाँले ब्रिक्स सदस्य राष्ट्रहरू विश्व आर्थिक वृद्धिका प्रमुख चालक भएको बताउनुभयो। पुटिनको टिप्पणी अक्टोबर २२–२४ मा काजानमा हुने १६औँ ब्रिक्स शिखर सम्मेलनअगाडि आएको हो।

पुटिनले सन् १९९२ मा जि–७ देशहरूको विश्व GDP मा ४५.५% हिस्सा थियो भने ब्रिक्सको हिस्सा १६.७% रहेको जानकारी दिनुभयो। तर सन् २०२३ मा ब्रिक्सको हिस्सा ३७.४% पुगेको छ, जबकि जि–७ को हिस्सा २९.३% मा घटेको छ, र यो अन्तर बढ्दै जाने उहाँले प्रस्ट पार्नुभयो।

पुटिनले रूसको अध्यक्षतामा हुने ब्रिक्स शिखर सम्मेलनमा सहभागी हुन भारतीय प्रधानमन्त्री नरेन्द्र मोदीको भ्रमणबारे पनि चर्चा गर्नुभयो। ब्रिक्सको स्थापना २००६ मा रूस, भारत, र चीनका नेताहरूको भेटघाटपछि भएको थियो, जसमा पछि दक्षिण अफ्रिका पनि समावेश गरियो। सन् २०२४ मा ब्रिक्सले इजिप्ट, इथियोपिया, इरान, र संयुक्त अरब इमिरेट्सलाई समूहमा समावेश गर्दै विस्तार गरेको छ।