जापानमा उष्णकटिबन्धीय आँधीको अवशेष फैलिएका कारण पहिरो र बाढीको जोखिम बढेको भन्दै करिब २ लाख मानिसलाई पश्चिमी जापानमा सुरक्षित स्थानमा जान आग्रह गरिएको छ। जापान मौसम विज्ञान एजेन्सीले पश्चिमी जापानमा न्यानो र आर्द्र हावाको प्रभावले अत्यधिक वर्षा भइरहेको बताएको छ, जसलाई आंशिक रूपमा आँधी कोङ-रेको प्रभाव मानिएको छ।

मात्सुयामा शहरका अधिकारीहरूले १० वटा जिल्लाका करिब १ लाख ८९ हजार ५ सय ५२ बासिन्दालाई उच्चतम स्तरको चेतावनी जारी गर्दै तत्काल सुरक्षित स्थानमा जान आग्रह गरेका छन्। यद्यपि, यो स्थानान्तरण अनिवार्य भने छैन, उच्चतम चेतावनी सामान्यतया विपत्ति अत्यन्त सम्भावना भएको अवस्थामा मात्र जारी गरिन्छ।

मौसमविद्हरूले शनिबार पश्चिमी जापान र आइतबार पूर्वी जापानमा पहिरो र बाढीको प्रभाव पर्ने चेतावनी दिएका छन्। भारी वर्षाका कारण टोक्यो र दक्षिणी फुकुओका क्षेत्रबीचको शिनकानसेन बुलेट रेल सेवामा पनि अवरोध आएको थियो, तर पछि ढिलासँग पुनः सञ्चालनमा आएको थियो।

कोङ–रे आँधीले यसअघि बिहीबार ताइवानमा ठूलो क्षति पुर्याएको थियो, जसमा कम्तिमा दुई जनाको मृत्यु र हजारौं घरधुरीमा बिजुली आपूर्ति अवरुद्ध भएको थियो। वैज्ञानिकहरूका अनुसार जलवायु परिवर्तनको प्रभावले यस प्रकारका अत्यधिक वर्षा र प्राकृतिक प्रकोपको जोखिम अझ बढाइरहेको छ।