नेपाल प्रिमियर लिग (एनपीएल) अन्तर्गत सम्पन्न खेलमा कर्णाली याक्सले जनकपुर बोल्ट्सलाई १९ रनले पराजित गर्दै प्रतियोगितामा सुखद र विजयी सुरुवात गरेको छ। कर्णालीले दिएको १३३ रनको मध्यम लक्ष्य पछ्याएको जनकपुर ३ बल बाँकी छँदै मात्र ११३ रनमा समेटिन पुग्यो।

जनकपुरका लागि अभिषेक तिवारीले सर्वाधिक २० रन बनाए भने कप्तान हर्मीत सिंह र मोइन अलीले समान १९–१९ रनको योगदान दिएका थिए । त्यस्तै जिम्मी निसमले १५, मयंक यादवले १४ र अनिलकुमार शाहले ११ रन बनाए पनि टोलीलाई जित दिलाउन सकेनन्।

जनकपुरलाई सस्तैमा समेट्न कर्णालीका बलरहरूले उत्कृष्ट प्रदर्शन गरे। युनिस ठकुरी र हुसेन तलतले समान ३–३ विकेट लिए। युनिसले ४ ओभरमा १ मेडनसहित ३ विकेट लिने क्रममा एकै ओभरमा जनकपुरका कप्तान हर्मीत र जिम्मी निसमलाई आउट गर्दै खेल कर्णालीको पकडमा ल्याएका थिए। त्यस्तै नन्दन यादवले २ तथा कप्तान सोमपाल कामीले १ विकेट हात पारे।

त्यसअघि त्रिवि क्रिकेट मैदानमा टस हारेर पहिले ब्याटिङ गरेको कर्णाली याक्सले निर्धारित २० ओभरमा ९ विकेट गुमाएर १३२ रन बनाएको थियो। सुरुवाती ओभरमै विकेट गुमाएर दबाबमा परेको कर्णालीका लागि ओपनर अरिफुल इस्लामले सर्वाधिक ४३ रन (२९ बल, ४ चौका) र पवन सर्राफले ३७ रन बनाए। चौथो विकेटका लागि यी दुईबीच भएको ४२ रनको महत्त्वपूर्ण साझेदारीले टोलीलाई सम्मानजनक योगफलसम्म पुर्‍याएको थियो। जनकपुरका तर्फबाट कप्तान हर्मीत सिंहले ३, मोइन अली र राहुल यादवले २–२ तथा ललित राजवंशीले १ विकेट लिएका थिए।