डिजिटल सवारी चालक अनुमतिपत्र (डिजिटल लाइसेन्स) नियमनलाई सहज बनाउन काठमाडौं उपत्यका ट्राफिक प्रहरी कार्यालयलाई ५१ थान मोबाइल फोन हस्तान्तरण गरिएको छ।

नेपाल प्रहरी प्रधान कार्यालयमा आयोजित कार्यक्रममा ई-सेवाका प्रमुख कार्यकारी अधिकृत जगदिश खड्काले प्रहरी महानिरीक्षक बसन्त बहादुर कुँवरलाई मोबाइल फोन हस्तान्तरण गरेका थिए ।

हस्तान्तरण कार्यक्रमलाई सम्बोधन गर्दै महानिरीक्षक कुँवरले डिजिटल चलान कार्यान्वयनमा यी मोबाइल फोनहरू महत्वपूर्ण हुने विश्वास व्यक्त गरे । साथै, प्रविधिमैत्री ट्राफिक व्यवस्थापनमा यस्ता सहकार्यले प्रभावकारी योगदान पुर्‍याउने धारणा पनि राखे ।

ई-सेवाका प्रमुख कार्यकारी खड्काले हस्तान्तरण गरिएका मोबाइलहरूले ट्राफिक प्रहरीद्वारा अपनाइएका नयाँ प्रविधिलाई सहयोग पुर्‍याउने बताउँदै, ट्राफिक प्रहरीको कामलाई थप प्रभावकारी बनाउन निरन्तर समन्वय गर्ने प्रतिबद्धता जनाएका छन् ।

उक्त कार्यक्रममा प्रहरी अतिरिक्त महानिरीक्षक, प्रहरी नायव महानिरीक्षक, ई-सेवाका पदाधिकारी, तथा वरिष्ठ प्रहरी अधिकारीहरूको उपस्थिति रहेको थियो।