सत्ता गठबन्धनका शीर्ष नेताहरूको बैठकले काठमाडौं महानगरपालिकाका मेयर बालेन शाह र दुर्गा प्रसाईंलाई प्रतिपक्ष दलका नेता पुष्पकमल दाहाल प्रचण्डले उचालेको निष्कर्ष निकालेको छ।

बैठकमा प्रधानमन्त्रीसमेत रहेका नेकपा एमालेका अध्यक्ष केपी शर्मा ओलीले सरकारले यस्तो सूचना पाएको भन्दै सामाजिक सञ्जाल र सदनबाट प्रतिवाद गरिने बताएका थिए। उनले सत्ता गठबन्धन भत्काउन र अस्थिरता निम्त्याउन प्रचण्डले यस्तो काम गरेको आरोप लगाएका थिए, जसको पुष्टि बैठकमा सहभागी एक नेताले गरेका छन्।

जनमत पार्टीका संसदीय दलका उपनेता अब्दुल खानले पनि बालेन शाह र दुर्गा प्रसाईंको पछाडि प्रचण्डको हात रहेको चर्चा भएको पुष्टि गर्दै, सदन र सामाजिक सञ्जालबाट प्रतिवाद गरिने कुरा बैठकमा भएको बताए।

बैठकमा सरकार र सदनको कामलाई प्रभावकारी बनाउने विषयमा पनि छलफल भएको थियो। साथै, विपक्षी दलका नेताले सदन र सार्वजनिक रूपमा दिएका अभिव्यक्तिहरूलाई गलत ठहर गर्दै त्यसको प्रतिवाद सदनबाटै गर्ने निष्कर्ष निकालेको छ।

बैठकमा काठमाडौं उपत्यकाका नदी किनारसम्बन्धी सर्वोच्च अदालतको पछिल्लो फैसलाबारे पुनरवलोकनमा जाने विषयमा पनि छलफल भएको थियो।