नेपाल कम्युनिस्ट पार्टीका संयोजक पुष्पकमल दाहाल ‘प्रचण्ड’ले पार्टीले थोरै सिट जिते पनि आफ्ना मुद्दाले जित हासिल गरेको बताएका छन्।

काठमाडौंमा आयोजित एक कार्यक्रममा बोल्दै उनले देशका उत्पीडित वर्ग, जाति, क्षेत्र र समुदायको पहिचान तथा अधिकार स्थापित हुनु आफ्नो राजनीतिक आन्दोलनको महत्वपूर्ण उपलब्धि भएको उल्लेख गरेका छन् ।

उनले भने, ‘पार्टीले थोरै सिट ल्याए पनि जनयुद्ध, जनआन्दोलन, शान्ति सम्झौता, संविधानसभा र गणतन्त्र निर्माणसम्म आइपुग्दा उत्पीडित समुदायको पहिचान र अधिकार स्थापित भएको छ। जहाँबाट जो–जो निर्वाचित भए पनि मलाई गर्व लाग्छ। यो हाम्रै बलिदान, त्याग र तपस्याको परिणाम हो।’

प्रचण्डले वर्तमान संसदमा पूर्वप्रधानमन्त्रीहरूमध्ये आफू मात्रै प्रतिनिधि सभामा वैधानिक रूपमा रहेको दाबी पनि गरे।

उनले थपे, ‘यो आफैंमा चुनौती पनि हो र अवसर पनि हो। सरकारले राम्रो काम गरोस् भन्ने हाम्रो चाहना छ। जहाँ राम्रो हुन्छ, त्यहाँ हाम्रो सहयोग रहन्छ र कमजोरी देखिएमा रचनात्मक आलोचना गर्छौं।’

उनले आफ्नो पार्टी आगामी दिनमा रचनात्मक र सृजनात्मक ढंगले अगाडि बढ्ने पनि बताए।