पूर्वराष्ट्रपति डा‍. रामवरण यादव लगायत पूर्वविशिष्ट व्यक्तिहरूले विदेशमा उपचार गराउँदा राज्यकोषबाट गैरकानुनी रूपमा उपचार खर्च लिएको आरोपसहित सर्वोच्च अदालतमा रिट दर्ता भएको छ ।

सरोज न्यौपानेले बिहीबार सर्वोच्च अदालतमा दायर गरेको रिटमा पूर्वराष्ट्रपति रामवरण यादव, पूर्वप्रधानमन्त्रीहरू केपी शर्मा ओली र झलनाथ खनाल, पूर्वपरराष्ट्रमन्त्री सुजाता कोइरालालाई विपक्षी बनाएर रिट दायर गरिएको छ ।

विदेशमा उपचार गराएको खर्च राज्यले व्यहोर्ने स्पष्ट कार्यविधि नभएको अवस्थामा मन्त्रिपरिषद्को निर्णयमार्फत उनीहरूले उपचार खर्च पाएको दाबी रिटमा गरिएको छ । उक्त रिटको पेशी शुक्रबारका लागि तोकिएको सर्वोच्च अदालतका प्रवक्ता अर्जुनप्रसाद कोइरालाले जानकारी दिए ।

नेपालमा उपचार सम्भव हुँदाहुँदै पनि पूर्व पदाधिकारीहरू विदेशमा उपचारका लागि जाने र मन्त्रिपरिषद्को निर्णयबाट राज्यकोषबाट खर्च व्यहोर्ने अभ्यास लामो समयदेखि चल्दै आएको थियो ।

२०७५ सालमा जनस्वास्थ्य ऐन जारी भएपछि यस्तो कार्यमा रोक लगाइएको भए पनि पछिल्ला कार्यविधिहरूको व्यवस्था प्रयोग गर्दै विशिष्ट पदाधिकारीहरूले विदेशमा उपचार गराउने क्रम जारी रहेको उल्लेख गरिएको छ ।