रसुवामा बाढीले बगाएका प्रहरी जवानको कुशको शवबनाइ दाहसंस्कार
बारा जिल्लाको फेटा गाउँपालिका–१ भलुहीका प्रहरी जवान मुन्ना ठाकुरको प्रतीकात्मक दाहसंस्कार गरिएको छ। उनी गत असार २४ गते रसुवामा आएको बाढीपछि बेपत्ता भएका थिए।
एक महिनासम्म निरन्तर खोजी प्रयास हुँदा पनि अवस्था अज्ञात रहँदा परिवारजन र आफन्तहरूले शुक्रबार हिन्दू परम्पराअनुसार कुशको शव बनाएर अन्त्येष्टि गरेका हुन्।
प्रहरी जवान ठाकुर नेपाल–चीन सीमास्थित ल्हेन्दे खोला र भोटेकोशी खोलाको संगमस्थलमा ड्युटीमा खटिएका बेला आएको भीषण बाढीमा बेपत्ता भएका थिए। उक्त बाढीले सीमावर्ती क्षेत्रमा ठूलो क्षति पुर्याएको थियो र केही प्रहरी संरचना समेत बगाएको थियो।
परम्पराअनुसार शव फेला नपरेको अवस्थामा कुशबाट पुत्ला बनाई अन्त्येष्टि गरिन्छ। परिवारजनका अनुसार यो धार्मिक प्रक्रिया मात्र नभई गहिरो भावनात्मक पीडाको प्रतीक हो।
यस घटनाले राज्यको उद्धार प्रणाली र प्राकृतिक विपत्तिमा हराउने सुरक्षाकर्मीहरूको अवस्थाबारे समयमै जानकारी दिन नसक्ने कमजोरीप्रति पनि प्रश्न उठाएको छ। मृतक जवानको परिवार अझै छोराको प्रतिक्षामा रहेको भए पनि सामाजिक तथा धार्मिक दायित्व पूरा गर्न बाध्य भएको बताइएको छ।
सुरक्षाकर्मीहरूको सेवामा जोखिम सदैव रहने भए पनि विपत्तिका बेला राज्यले बेपत्ता हुनेहरूको खोजी, राहत र परिवारलाई सम्मानजनक सहयोग तत्काल उपलब्ध गराउनुपर्ने आवाज उठ्न थालेको छ।
धेरै पढिएका
तपाईको प्रतिक्रिया दिनुहोस