नेपाल प्रिमियर लिग (एनपीएल) को तेस्रो संस्करण सुरु हुन एक दिन मात्र बाँकी रहँदा पाकिस्तानी खेलाडीहरूको सहभागितामा गम्भीर अन्योल उत्पन्न भएको छ। पाकिस्तान क्रिकेट बोर्ड (पीसीबी) ले आवश्यक ‘नो अब्जेक्सन लेटर’ (एनओसी) दिन ढिलाइ गर्नुका साथै प्रतिखेलाडी २५ हजार अमेरिकी डलर शुल्क मागेको दाबी बाहिर आएपछि फ्रेन्चाइज टोलीहरू चिन्तित बनेका छन्।

कीर्तिपुरस्थित त्रिवि अन्तर्राष्ट्रिय क्रिकेट मैदानमा सोमबार (अक्टोबर २६) देखि नोभेम्बर २१ सम्म सञ्चालन हुने यस प्रतियोगितामा विभिन्न टोलीले पाकिस्तानका चर्चित अन्तर्राष्ट्रिय तथा व्यावसायिक क्रिकेट खेलाडीहरूलाई अनुबन्ध गरेका छन्।

कुन टोलीमा छन् कुन पाकिस्तानी खेलाडी?

चितवन राइनोज: हसन अली र उसामा मिर

जनकपुर बोल्ट्स: इफ्तिखार अहमद र हुनैन शाह

कर्णाली याक्स: साहिबजादा फरहान (पाकिस्तानका टी–२० कप्तान) र हुसेन तलत

सुदूरपश्चिम रोयल्स: हैदर अली

यीमध्ये केही खेलाडी काठमाडौँ पुगिसकेका छन् भने अन्य खेलाडीहरू समस्या समाधान नभएसम्मका लागि यात्रा स्थगित गरेर बसेका छन्।

के हो विवाद?
क्रिकेटसम्बन्धी चर्चित सञ्चारमाध्यम ‘इएसपिएन क्रिकइन्फो’ का अनुसार पीसीबीले एनओसी दिनका लागि प्रतिखेलाडी २५ हजार अमेरिकी डलर मागेको दाबी गरिएको छ। यसअघि अमेरिकाको मेजर लिग क्रिकेट (एमएलसी) मा पनि पीसीबीले यस्तै किसिमको शुल्क मागेको गुनासो बाहिर आएको थियो। यद्यपि, पीसीबीबाट यस विषयमा आधिकारिक लिखित पुष्टि भने भइसकेको छैन।

नेपाल क्रिकेट संघ (क्यान) का सचिव पारस खड्काले पनि पाकिस्तानी खेलाडीको एनओसी रोकिएको विषयमा आफूहरूले जानकारी पाएको बताएका छन्। उनले एनओसी सम्बन्धित राष्ट्रिय बोर्डको आन्तरिक निर्णय भएको र बिना एनओसी खेलाडीले एनपीएल खेल्न नपाउने स्पष्ट पारेका छन्।

फ्रेन्चाइज टोलीलाई आर्थिक चुनौती
प्रतियोगिताको ठीक अघिल्लो दिन खेलाडीको उपलब्धता अनिश्चित बन्दा फ्रेन्चाइज टोलीहरूको रणनीति र आर्थिक योजना प्रभावित भएको छ। यदि प्रतिखेलाडी २५ हजार डलर तिर्नुपर्ने दाबी सत्य ठहरिएमा ६ देखि ७ जना खेलाडीका लागि मात्रै टोलीहरूले अतिरिक्त डेढ देखि पौने दुई लाख अमेरिकी डलरसम्मको आर्थिक भार ब्यहोर्नुपर्ने हुनसक्छ। समयमै एनओसी नआएमा विकल्प खोज्नुपर्ने दबाब पनि टोलीहरूलाई छ।