हिजो बिहानदेखि लगातार परेको वर्षाका कारण मुलुकका विभिन्न राजमार्ग अवरुद्ध भएका छन्। प्रहरीका अनुसार कोशी प्रदेशका चार, बागमती प्रदेशका छ, गण्डकी प्रदेशका दुई र कर्णाली प्रदेशको एक राजमार्ग पूर्ण रूपमा बन्द भएका छन्।

कोशी प्रदेशमा कोशी राजमार्ग, मेची राजमार्ग, तमोर कोरिडोर सडकखण्ड र सिद्धिचरण लोकमार्गमा आवागमन पूर्ण रूपमा रोकिएको छ। बागमती प्रदेशमा भने बिपी राजमार्ग, नेपाल–चीन नाका जोड्ने पुल, पासाङ ल्हामु सडकखण्ड, मध्यपहाडी लोकमार्ग, र नारायणगढ–मुग्लिङ सडकखण्डमा सवारी आवागमन बन्द भएको छ।

गण्डकी प्रदेशमा जोमसोम–कोरोला सडकखण्ड र बेनी–दरबाङ सडकखण्ड पूर्ण रूपमा अवरुद्ध छन्। कर्णाली प्रदेशमा भेरी कोरिडोर सडकखण्ड पहिरोका कारण बन्द भएको छ।

यसैबीच, लुम्बिनी प्रदेशको सन्धिखर्क–गोरुसिङ्गे सडकखण्डमा भने एकतर्फी रूपमा सवारी आवागमन सुचारु गरिएको छ।