दोस्रो संस्करणको नेपाल प्रिमियर लिग (एनपीएल) अन्तर्गत आज (बिहीबार) दुई खेल हुँदैछन्। पहिलो खेल बिहान ११:४५ बजे पोखरा एभेन्जर्स र काठमाण्डु गोर्खाजबीच हुनेछ भने अपराह्न ४ बजे सुदूरपश्चिम रोयल्स र चितवन राइनोज आमनेसामने हुनेछन्।

पोखराको कप्तानी कुशल भुर्तेलले सम्हालेका छन् भने काठमाण्डुको नेतृत्व करण केसीले गर्ने छन्। त्यस्तै, सुदूरपश्चिमको कप्तानी दीपेन्द्रसिंह ऐरी र चितवनको नेतृत्व कुशल मल्लले गरेका छन्। आजको खेलमा कुशल–करण र दीपेन्द्र–कुशलबीच रोचक प्रतिस्पर्धा हुने अनुमान गरिएको छ।

पाँच खेलबाट चार अंक मात्र जोडेको पोखरालाई प्लेअफ आशा जोगाइराख्न अनिवार्य जीत आवश्यक छ। काठमाण्डु भने छ खेलबाट आठ अंकसहित सशक्त अवस्थामा छ।

पहिले नै प्लेअफ सुरक्षित गरिसकेको सुदूरपश्चिम आज प्लेअफ प्रवेशका लागि दबाबमा रहेको चितवनसँग भिड्दैछ। सुदूरपश्चिम १० अंकसहित तालिकाको शीर्षस्थानमा छ भने चितवनले पाँच खेलबाट चार अंक जोडेको छ।

एनपीएल दोस्रो सिजनका सबै खेल दिउँसो र राति गरी कीर्तिपुरस्थित त्रिवि मैदानमा सञ्चालन भइरहेको छ। क्यानले प्रत्येक खेलका लागि ९ हजार ४५० टिकट बिक्रीमा राख्दै आएको छ। मंसिर १ बाट सुरु भएको लिग मंसिर २७ गतेसम्म चल्नेछ।

एनपीएलमा लिग चरण, तीन प्लेअफ र फाइनलसहित ३२ खेल हुनेछन्। शनिबारका खेलका लागि टिकट मूल्य साधारण ५०० र प्रिमियम १५०० रुपैयाँ तोकिएको छ। अन्य दिनका लिग खेलमा सामान्य ५०० र प्रिमियम १००० रुपैयाँ पर्नेछ। प्लेअफपछि टिकट मूल्य क्रमशः १००० र २००० रुपैयाँ हुनेछ।

जनकपुर बोल्ट्स, सुदूरपश्चिम रोयल्स, कर्णाली याक्स, पोखरा एभेन्जर्स, विराटनगर किंग्स, चितवन राइनोज, काठमाण्डु गोर्खाज र लुम्बिनी लायन्स गरी आठ फ्रेन्चाइज टोलीले यस सिजन प्रतिस्पर्धा गरिरहेका छन्।