फिफा विश्वकप २०२६ अन्तर्गत समूह चरणको अन्तिम भिडन्तमा लोकतान्त्रिक गणतन्त्र कंगो (डीआर कंगो) ले ऐतिहासिक सफलता हात पारेको छ। शनिबार एटलान्टामा भएको रोमाञ्चक खेलमा स्टार फरवार्ड योआने विस्साको दुई गोलको मद्दतले उज्बेकिस्तानलाई ३–१ गोल अन्तरले पराजित गर्दै कंगोले इतिहासमै पहिलो पटक विश्वकपको अन्तिम ३२ (नकआउट चरण) मा स्थान सुरक्षित गरेको हो। विश्वकप इतिहासमै टोलीको यो पहिलो जित समेत हो। अब अफ्रिकी टोली कंगोले नकआउट चरणमा बलियो प्रतिद्वन्द्वी इङ्ल्यान्डको चुनौती सामना गर्नेछ।

खेलको सुरुआतमै उज्बेकिस्तानका एल्डोर शोमुरोदोभले गोलकिपर लियोनल म्पासीमाथिबाट आकर्षक चिप प्रहार गर्दै टोलीलाई अग्रता दिलाएका थिए। तर, कंगोले उत्कृष्ट पुनरागमन गर्दै न्यूक्यासल युनाइटेडका फरवार्ड योआने विस्साको पेनाल्टी गोलमार्फत खेललाई बराबरीमा ल्यायो। त्यसलगत्तै फिस्टोन मायेलले गोल गर्दै कंगोलाई खेलमा अगाडि बढाए भने खेलको इन्जुरी समयमा विस्साले व्यक्तिगत दोस्रो गोल गर्दै टोलीको ऐतिहासिक जित सुनिश्चित गरे।

अर्कोतर्फ, न्यू जर्सीमा भएको समूह ‘एल’ को खेलमा जुड बेलिङहमको सानदार प्रदर्शनको बलमा इङ्ल्यान्डले पानामालाई २–० ले पाखा लगाउँदै समूह विजेताको रूपमा अन्तिम ३२ मा यात्रा तय गरेको छ। खेलको एक घण्टाभन्दा बढी समयसम्म पानामाले इङ्ल्यान्डलाई रोके पनि बेलिङहमले पहिलो गोल गर्दै गतिरोध तोडेका थिए। पछि बेलिङहमकै पासमा कप्तान ह्यारी केनले हेडमार्फत दोस्रो गोल गरे। यस गोलसँगै केनले विश्वकपमा आफ्नो ११औँ गोल पूरा गर्दै ग्यारी लिनेकरलाई उछिनेर इङ्ल्यान्डका लागि विश्वकप इतिहासमा सर्वाधिक गोल गर्ने कीर्तिमान आफ्नो नाममा लेखेका छन्।

यसै समूहको अर्को प्रतिस्पर्धामा क्रोएसियाले घानालाई २–१ ले पराजित गर्दै समूह उपविजेताको स्थान सुरक्षित गरेको छ। क्रोएसियाका लागि पेटार सुचिचले सुरुवाती अग्रता दिलाए पनि घानाका लागि डेब्यु गरिरहेका डेरेक लकासेनले भिएआर (VAR) जाँचपछि मान्यता पाएको गोलमार्फत खेल बराबरीमा ल्याएका थिए। तर, ८३औँ मिनेटमा कप्तान लुका मोड्रिचको कर्नरमा निकोला भ्लासिचले उत्कृष्ट हेडर गोल गर्दै क्रोएसियाको जित निश्चित गरे। सन् २०२२ को विश्वकप उपविजेता क्रोएसियाले अब आगामी बिहीबार टोरोन्टोमा समूह ‘के’ को उपविजेता पोर्चुगलसँग नकआउट खेल खेल्नेछ।