अन्तर्राष्ट्रिय सञ्चारमाध्यम CNN का अनुसार इरानले मध्यपूर्वका विभिन्न क्षेत्रमा पुनः व्यापक सैन्य आक्रमण सुरु गरेको जनाएको छ।

पछिल्लो चरणमा इरानले मिसाइल र ड्रोनमार्फत अमेरिकी सैन्य उपस्थिति रहेका स्थान तथा तिनका क्षेत्रीय साझेदारलाई लक्षित गरेको बताइएको छ। सीएनएनका अनुसार इरानले इराक, सिरिया र खाडी क्षेत्र आसपास रहेका अमेरिकी रणनीतिक सैन्य संरचनातर्फ नयाँ ‘वेभ अफ स्ट्राइक्स’ सञ्चालन गरेको पुष्टि भएको छ।

सुरक्षा स्रोतका अनुसार केही स्थानमा विस्फोटका आवाज सुनिएका छन् भने हवाई प्रतिरक्षा प्रणाली सक्रिय पारिएको छ। अमेरिकी रक्षा अधिकारीहरूलाई उद्धृत गर्दै सीएनएनले आक्रमणहरू विभिन्न दिशाबाट समन्वित ढंगले गरिएको जनाएको छ, जसले क्षेत्रीय तनाव थप खतरनाक स्तरमा पुगेको संकेत गरेको छ।

इरानले यसअघि अमेरिकी–इजरायली सैन्य कारबाहीको प्रतिकारस्वरूप क्षेत्रभर ‘निरन्तर जवाफी कदम’ चाल्ने चेतावनी दिएको थियो। पछिल्लो आक्रमण सोही रणनीतिक प्रतिक्रियाको निरन्तरता मानिएको छ।

खाडी क्षेत्रका कतार, बहराइन, कुवेत र संयुक्त अरब इमिरेट्सले सैन्य सतर्कता उच्च बनाएका छन्। केही देशहरूले हवाई क्षेत्र आंशिक रूपमा सीमित गरेका छन् भने अन्तर्राष्ट्रिय उडान र ऊर्जा आपूर्ति सुरक्षाबारे चिन्ता बढेको छ।

विश्लेषकहरूका अनुसार इरानको लगातार आक्रमणले द्वन्द्व अब दुई देशबीच सीमित नरही ‘क्षेत्रीय सैन्य टकराव’तर्फ रूपान्तरण हुने जोखिम बढाएको छ।

यसैबीच, दुबईस्थित एक विमानस्थलमा आक्रमणपछि आगलागी भएको र बहराइनका केही संरचनामा क्षति पुगेको जनाइएको छ। इरानको रिभोल्युशनरी गार्डले अमेरिकाविरुद्ध “इतिहासकै ठूलो र अकल्पनीय आक्रमण” गर्ने चेतावनी समेत दिएको बताइएको छ।

यद्यपि, यी घटनाबारे सम्बन्धित देशका सरकारी निकायबाट विस्तृत आधिकारिक पुष्टि आउन बाँकी छ।