माल्दिभ्सका राष्ट्रपति मोहम्मद मुइज्जुले एक लाख ५० हजार आप्रवासीले बायोमेट्रिक दर्ता पूरा गरेको घोषणा गरेका छन् ।

सन् २०२४ को मे महिनामा सुरु गरिएको यो पहलको उद्देश्य माल्दिभ्समा गैरकानुनी कामदारको समस्या समाधान गर्नु रहेको राष्ट्रपतिको कार्यालयले जनाएको छ ।

आफ्नो सन्देशमा राष्ट्रपति मुइज्जुले आप्रवासी कामदारहरू देशको श्रम शक्तिको बहुमत रहेको उल्लेख गर्दै उनीहरूको परिस्थिति र काम गर्ने अवस्थालाई बुझ्नुको महत्त्वमा जोड दिएका छन् ।

उनले भने, “एक व्यापक बायोमेट्रिक पहिचान प्रणाली स्थापना कागजातविहीन कामदारहरूको लामो समयदेखिको चुनौतीहरूलाई सम्बोधन गर्न एक महत्वपूर्ण कदम हो, र यो प्रवासीहरूको कर्तब्य र अधिकारलाई नियमन र संरक्षण गर्ने सरकारको प्रयासमा एक महत्वपूर्ण कोसेढुङ्गा हो।”

माल्दिभ्स सरकारले सन् २०२७ को अप्रिलसम्म माल्दिभ्समा अवैध आप्रवासीको समस्याको स्थायी समाधान निकाल्ने लक्ष्य राखेको छ र करिब सात हजार अवैध आप्रवासीले देश छोडेको स्थानीय सञ्चारमाध्यमले बिहीबार जनाएका छन् ।