बंगालको खाडीबाट आएका जलवाष्पयुक्त हावाको कारण केही दिनयता लगातार वर्षा भइरहेको छ। मौसमविद्हरूका अनुसार आज शुक्रबार देशका धेरैजसो भागमा मध्यम वर्षा हुने छ भने शनिबारबाट भने वर्षाको प्रभाव केही कम हुने प्रक्षेपण गरिएको छ।

वरिष्ठ मौसमविद् प्रतिभा मानन्धरका अनुसार आज दिउँसो कोशी, गण्डकी र सुदूरपश्चिम प्रदेशका केही स्थानमा भारी वर्षा हुने सम्भावना छ। आज राति पनि कोशी र सुदूरपश्चिम प्रदेशमा मात्रै भारी वर्षा हुने देखिन्छ।

उनले भनिन्, “आज अधिकांश स्थानमा मध्यम वर्षा हुने सम्भावना छ। तर शनिबारबाट भने मनसुनको गतिविधि केही कमजोर हुनेछ।”

मौसम पूर्वानुमान महाशाखाका अनुसार हाल मनसुनको न्यून चापीय रेखा पश्चिमतर्फ नेपाल नजिक उत्तरतिर सरिरहेको छ भने पूर्वतर्फ भारतको भूभागमा अवस्थित छ। यससँगै बंगालको खाडीबाट आएको जलवाष्पयुक्त हावाले नेपालमा निरन्तर पानी पर्ने अवस्था बनाएको हो।

शनिबारबाट सुधार

मौसमविद् गोविन्द झालेका अनुसार शनिबारदेखि मनसुनको प्रभाव क्रमशः घट्नेछ। उनले भने, “शनिबार नेपालमा मनसुनको गतिविधि तुलनात्मक रूपमा अलिकति कमजोर रहने देखिन्छ।”

यसअघि केही दिनयता लगातार वर्षा हुँदा कतिपय स्थानमा पहिरो, सडक अवरोध र बाढीको जोखिम पनि बढेको थियो।