इतिहास र साहसिक पर्यटनको ७६ वर्ष: यसरी मनाइँदै छ अन्नपूर्ण आरोहण दिवस
८ हजार मिटरभन्दा अग्लो हिमालमा पहिलो मानव पाइला परेको ऐतिहासिक दिनको स्मरण गर्दै आज अन्नपूर्ण प्रथम हिमाल आरोहणको ७६औँ वार्षिकोत्सव भव्य रूपमा मनाइँदै छ। म्याग्दी, कास्की, मनाङ र मुस्ताङको सिमानामा अवस्थित ८,०९१ मिटर अग्लो अन्नपूर्ण हिमालको आधार शिविर म्याग्दीको अन्नपूर्ण गाउँपालिका–४ नारच्याङमा पर्दछ।
सन् १९५० जुन ३ मा फ्रान्सेली नागरिकद्वय मौरिस हर्जोग र लुइस लाचेनलको टोलीले पहिलोपटक अन्नपूर्णको शिखर चुमेर इतिहास रचेको थियो। विश्वको सर्वोच्च शिखर सगरमाथा आरोहण हुनुभन्दा तीन वर्षअघि नै अन्नपूर्णमा मानव पाइला पुगिसकेकाले यसलाई 'जेठो हिमाल'का रूपमा समेत चिनिन्छ।
नेपालको पर्वतारोहण र पर्यटन क्षेत्रको प्रस्थानविन्दु मानिने यस ऐतिहासिक दिनको अवसरमा गण्डकी प्रदेशका विभिन्न स्थानीय तहहरूले विविध कार्यक्रम आयोजना गरेका छन्। अन्नपूर्ण गाउँपालिकाका अध्यक्ष भारतकुमार पुनका अनुसार नेपाललाई विश्वभर चिनाउने यस दिनको सम्झनामा पर्यटन प्रवर्द्धन गर्ने उद्देश्यका साथ विभिन्न उत्सव र साहसिक खेलकुदका कार्यक्रम राखिएका छन्।
नयाँ पदमार्ग र दौड प्रतियोगिता
दिवसकै अवसरमा कास्कीको अन्नपूर्ण गाउँपालिकाको आयोजनामा घान्द्रुकतर्फको आधार शिविरमा दौड प्रतियोगिता आयोजना गरिएको छ। यस्तै, नयाँ पदमार्गको प्रवर्द्धनका लागि लमजुङको दोर्दी गाउँपालिकामा पनि विशेष कार्यक्रम भइरहेको छ।
नारच्याङमा सोमबारदेखि सुरु भएको दिवसको समापन आज विशेष सांस्कृतिक कार्यक्रम र पुरस्कार वितरण समारोहका साथ गरिँदै छ। नेपाल भूतपूर्व खेलाडी मञ्च र गण्डकी प्रदेश एथलेटिक्स संघको प्राविधिक सहयोगमा आयोजित ३६ किलोमिटर लामो खुला दौड प्रतियोगितामा २० जना धावकहरू सहभागी छन्।
तपाईको प्रतिक्रिया दिनुहोस