देशभर मनसुनी वायुको प्रभाव तीव्र भएसँगै जल तथा मौसम विज्ञान विभाग अन्तर्गतको बाढी पूर्वानुमान महाशाखाले काठमाडौँ उपत्यकामा आकस्मिक बाढीको उच्च जोखिम रहेको जनाएको छ । 

मनसुनको न्यून चापीय रेखा नेपालको दक्षिणी भू-भाग नजिक रहेकाले हाल देशभर आंशिकदेखि सामान्य बदली भई कोशी, बागमती, गण्डकी र लुम्बिनी प्रदेशका केही स्थान तथा मधेश, कर्णाली र सुदूरपश्चिमका थोरै स्थानमा हल्कादेखि मध्यम वर्षा भइरहेको छ । महाशाखाले शनिबार बिहान जारी गरेको बाढी पूर्वानुमान बुलेटिन अनुसार आज काठमाडौँ, भक्तपुर, ललितपुर, काभ्रे र आसपासका जिल्ला भई बहने केही स-साना नदीहरूमा आकस्मिक बाढीको उच्च जोखिम रहेको छ ।

यस्तै, देशका अन्य ३१ जिल्लामा आकस्मिक बाढीको मध्यम जोखिम रहेको महाशाखाले उल्लेख गरेको छ । 

नुवाकोट, ताप्लेजुङ, सङ्खुवासभा, तेह्रथुम, पाँचथर, खोटाङ, दोलखा, रामेछाप, सिन्धुली, मकवानपुर, चितवन, नवलपरासी, कास्की, रसुवा, धादिङ, बारा, पर्सा, रौतहट, कपिलवस्तु, रुपन्देही, बाँके, बर्दिया, कैलाली, कञ्चनपुर, दाङ, प्युठान, जाजरकोट, जुम्ला, दार्चुला र आसपासका जिल्ला भई बहने स-साना नदीहरूको बहाव उल्लेख्य बढ्ने अनुमान गरिएको छ । यी नदीहरूमा आकस्मिक बाढीको जोखिम रहने भएकाले तटीय क्षेत्रका बासिन्दालाई विशेष सतर्कता अपनाउन आवश्यक देखिएको छ ।

हालको मापन अनुसार कोशी, नारायणी, बागमती, कर्णाली, महाकाली, कन्काई, कमला, बबई, पूर्वी राप्ती र पश्चिम राप्ती लगायतका ठूला नदी तथा यिनका सहायक नदीहरूको बहाव भने सतर्कता तह भन्दा तलै रहेको छ । 

यद्यपि, आगामी दुई दिन अर्थात् असार २८ र २९ गते पनि देशभरका नदीहरूमा बाढीको जोखिम कायमै रहने पूर्वानुमान गरिएको छ । आगामी दुई दिन सातै प्रदेश भई बहने स-साना नदीहरूमा बहाव आकस्मिक रूपमा बढ्न सक्ने सम्भावना रहेकाले महाशाखाले सर्वसाधारणलाई आवश्यक सतर्कता र पूर्वसावधानी अपनाउन अनुरोध गरेको छ ।