सुनकोशी गाउँपालिका–१ स्थित आदिलिङ्ग कुशेश्वर महादेव मन्दिर परिसरमा बाढीका कारण थुनिएका ३३ जनाको सकुशल उद्धार गरिएको छ। तीमध्ये २६ जना गुरुकुलका विद्यार्थी (बटुक), ३ शिक्षक, २ कर्मचारी, र मन्दिरका २ पुजारी रहेका थिए। उनीहरूलाई नेपाली सेनाको हेलिकप्टरमार्फत उद्धार गरिएको हो।

प्रहरी उपरीक्षक गोविन्दराज काफ्लेका अनुसार, यी सबैजना शुक्रबार रातिदेखि सुनकोशी नदी र रोशी खोलाको बाढीका कारण मन्दिरको बीच भागमा फसेका थिए। बाढी मन्दिर परिसरको चारैतिर फैलिएको हुँदा उनीहरू सुरक्षित स्थानमा जान नसकिरहेका थिए।

स्थानीय प्रहरी र सशस्त्र प्रहरी बलले शुक्रबारदेखि नै उद्धार प्रयास थाले पनि सफल हुन नसकेपछि काठमाडौँबाट नेपाली सेनाको हेलिकप्टर मगाउनुपरेको प्रमुख जिल्ला अधिकारी लीलाप्रसाद शर्माले जानकारी दिए।

सुनकोशी र रोशी नदीको बाढीले आसपासका क्षेत्रमा ठूलो क्षति पुर्याएको छ। सुनकोशी–५ मुल्कोट र गोलञ्जोर गाउँपालिका–७ खुर्कोट बजार बाढीको कारण डुबानमा परेका छन् भने दुम्जामा पाँच घर बाढीले बगाएको छ। दुम्जा र नेपालथोकबीचको बिपी राजमार्गको केही भाग पनि बाढीले बगाएकोले यातायात सेवा बन्द भएको छ।