काठमाडौँ विश्वविद्यालयका विद्यार्थीहरूले विद्यार्थी कल्याण परिषद् (स्टुडेन्ट वेलफेयर काउन्सिल) को निर्वाचन प्रत्यक्ष मतदान प्रणालीबाट गरिनुपर्ने माग गर्दै आन्दोलनको घोषणा गरेका छन् ।

विश्वविद्यालय प्रशासनले स्कुल अफ साइन्स र स्कुल अफ इञ्जिनियरिङमा कक्षा प्रतिनिधि (सिआर) प्रणालीमार्फत निर्वाचन गराउने तयारी थालेपछि असन्तुष्ट विद्यार्थीहरूले सोमबार बिहान ११:३० बजे प्रशासन घेराउ गर्ने कार्यक्रम तय गरेका हुन् ।

विद्यार्थीहरूका अनुसार प्रशासनले यसअघि वि.सं. २०८२ मा प्रत्यक्ष निर्वाचन प्रणालीमार्फत चुनाव गराउने सूचना जारी गरेको थियो । तर समानुपातिक प्रतिनिधित्वसम्बन्धी विषयमा सहमति नजुट्दा सो समयमा निर्वाचन हुन सकेको थिएन ।

अहिले पुनः सिआर प्रणालीमा फर्किएर निर्वाचन गराउन खोजिएको भन्दै विद्यार्थीहरूले आपत्ति जनाएका छन् । सिआर प्रणाली अनुसार कक्षा प्रतिनिधिहरूले मात्र अध्यक्षसहित पदाधिकारी चयन गर्ने व्यवस्था रहन्छ, जसलाई विद्यार्थीहरूले अप्रत्यक्ष र अलोकतान्त्रिक प्रक्रिया भएको बताएका छन् ।

विद्यार्थीहरूको भनाइमा प्रत्यक्ष मतदान प्रणालीले मात्र आम विद्यार्थीको वास्तविक अभिमत प्रतिनिधित्व गर्ने र नेतृत्वलाई उत्तरदायी बनाउनेछ । उनीहरूले विगतमा कानुन संकायमा सिआर प्रणालीबाट भएको निर्वाचनमा आर्थिक अपारदर्शिता र ‘किनबेच’ जस्ता समस्या देखिएको आरोप पनि लगाएका छन् ।

प्रशासनले आफू निकटका व्यक्तिहरूलाई नेतृत्वमा ल्याउन सिआर प्रणाली लागू गर्न खोजेको विद्यार्थीहरूको दाबी छ । आन्दोलन अन्तर्गत विद्यार्थीहरूले विश्वविद्यालय परिसर तथा अनलाइन माध्यममार्फत हस्ताक्षर संकलन, भित्ते पत्रिका, पोस्टर र सामाजिक सञ्जालमार्फत जनचेतनामूलक अभियान सञ्चालन गरिरहेका छन् । विश्वविद्यालयमा क्रियाशील विभिन्न विद्यार्थी संगठनहरूले पनि प्रत्यक्ष निर्वाचनको मागमा ऐक्येबद्धता जनाएका छन् ।

यसैबीच, विश्वविद्यालय परिसर र आसपास क्षेत्रमा प्रहरीको उपस्थिति बाक्लो बनाइएको छ । विद्यार्थीहरूले प्राज्ञिक क्षेत्रमा प्रहरी परिचालन र निगरानीले पठनपाठन तथा शैक्षिक वातावरणमा असर परेको भन्दै आपत्ति जनाएका छन् ।