मन्थली, रामेछाप, २८ असोज ।

दसैंको यात्रामा दुर्घटनाको सम्भावना कम गर्न रामेछाप जिल्लाको खाँडादेवी गाउँपालिका–३ स्थित भिरपानीमा निःशुल्क खाजा सहितको विश्रामस्थल स्थापना गरिएको छ। दसैंको अवसरमा यात्रुको संख्यामा वृद्धि र लामो यात्रा गर्दा हुन सक्ने थकानले दुर्घटना जोखिम बढ्न सक्ने भएकाले प्रहरी र खाँडादेवी गाउँपालिका–६ माकादुमको सहकार्यमा यो सुविधा उपलब्ध गराइएको हो।

खुर्कोट र खैरेनीघाटको पुल बाढीले बगाएपछि लामो दूरीको सवारी नेपालथोक, मुडे, चरीकोट हुँदै मन्थली मार्गबाट यात्रा गर्ने क्रममा रहेका छन्। यस रुटमा यात्रीको सुरक्षाका लागि विश्रामस्थल सञ्चालन गरिएको वडा नं ६ का अध्यक्ष नारायण कार्कीले जानकारी दिनुभयो। उहाँका अनुसार, लामो दूरीका सवारीसाधनमा प्राविधिक समस्याको कारणले दुर्घटना हुने सम्भावना हुने हुँदा सवारी रोकेर यात्रुलाई आराम गराउन यो पहल गरिएको हो।

विश्रामस्थलमा चालक र यात्रुलाई निःशुल्क बिस्कुट, चाउचाउ, पानी, र चिसो पेयपदार्थ उपलब्ध गराइएको छ। जिल्ला प्रहरी कार्यालय प्रमुख प्रदीपकुमार सिंहका अनुसार यो व्यवस्था यात्रुहरूलाई सुरक्षित र आरामदायी बनाउँदै दुर्घटनाको जोखिम कम गर्न प्रभावकारी बनेको छ।

सडकको भिरपानी क्षेत्र, जहाँ सख्त उकालो र ओरालो सडक छ, जोखिमयुक्त मानिने भएकाले यो विश्राम स्थलले थकान कम गर्ने र सवारी चालकलाई सचेत गराउने प्रयास गरेको छ। यो अभियान दसैं मनाउन घर जान हिँडेका यात्रुलाई लक्षित गरी असोज २४ र २५ गतेदेखि सुरू गरिएको हो, र अब दसैंपछि फर्किने यात्रुका लागि पुनः सञ्चालन गरिने योजना रहेको छ।

यो पनि पढ्नुहोस

बाँकेको सुतैया ताल: आन्तरिक पर्यटकको नयाँ गन्तव्य बन्दै