श्रीलङ्काले अमेरिकी दूतावासले सम्भावित आक्रमणको चेतावनी दिएपछि लोकप्रिय सर्फिङ गन्तव्य अरुगम बेमा रहेको यहुदी सामुदायिक केन्द्र वरपर सेना परिचालन गरेको छ। यसै क्रममा, प्रहरीले पनि गस्ती बढाएको छ। पूर्वी श्रीलङ्काको अरुगम बे क्षेत्रमा इजरायली स्वामित्वका व्यवसायहरूको बहिष्कारका लागि सामाजिक सञ्जालमा आह्वान गरिएपछि सुरक्षा सतर्कता बढाइएको हो।

प्रहरी प्रवक्ता निहाल थल्दुवाले बताए अनुसार, "इजरायलीहरूले सञ्चालन गरेको 'चाबाड हाउस' नामक सामुदायिक केन्द्र लक्षित हुन सक्ने सूचना प्राप्त भएको छ, र यसलाई ध्यानमा राख्दै हामीले सुरक्षा उपायहरू थप कडा बनाएका छौँ।"

यो चेतावनी इजरायली पर्यटक र अरुगम बेको मुस्लिम समुदाय बीचको हालैको तनावको कारण आएको हो। श्रीलङ्काका सुरक्षा अधिकारीहरूले यस क्षेत्रमा सेना, नौसेना, र प्रहरी कमान्डो परिचालन गरी चेकपोइन्टहरूमा सुरक्षा कडा पारेका छन्।

श्रीलङ्कामा गाजा र लेबनानमा इजरायलले हमास र हिजबुल्लाह सँगको लडाइँको विरोधमा भइरहेका प्रदर्शनहरूले बौद्ध धर्मावलम्बी बाहुल्य देशमा समर्थन पाएको छ। स्थानीय मुस्लिम समूहहरूले गरेको विरोधमा पनि व्यापक जनसमर्थन देखिएको छ।

यस साता मात्रै श्रीलङ्कामा भ्रमण गर्ने इजरायली पर्यटकको सङ्ख्या २० हजार भन्दा कम थियो, तर अरुगम बे सर्फिङ गन्तव्य इजरायली पर्यटकहरूको लागि अत्यन्तै लोकप्रिय छ। श्रीलङ्काको अरुगम बे कोलम्बो बाट करिब ४०० किलोमिटर पूर्वमा रहेको छ, त्यहाँ हाल सुरक्षा अवस्थामा उच्च सतर्कता अपनाइएको छ।

अमेरिकी दूतावासले बुधबार पूर्वी अरुगम बेमा रहेको यहुदी सामुदायिक केन्द्रमा आक्रमणको विश्वसनीय सूचना पाएको बताउँदै तत्काल सतर्क रहन चेतावनी जारी गरेको थियो। यस चेतावनी लाई बेलायत र क्यानाडाले आफ्नो वेबसाइटमा पोष्ट गरेका छन् भने रुसी दूतावासले पनि आफ्ना नागरिकहरूलाई श्रीलङ्का भ्रमणका क्रममा भीडभाडबाट टाढा रहन सल्लाह दिएको छ।

इजरायली राष्ट्रिय सुरक्षा परिषद् (एनएससी) ले पनि श्रीलङ्कामा आतङ्कवादी खतराहरू रहेको जनाउँदै यात्रा चेतावनी स्तर बढाएको छ। इजरायलले अरुगम बेमा रहेका आफ्ना नागरिकहरूलाई श्रीलङ्का छोड्न वा कम्तिमा राजधानी कोलम्बोमा जान आग्रह गरेको छ।

विगतका आक्रमण र हालको सुरक्षा स्थिति

श्रीलङ्कामा २०१९ को इस्टर सन्डे बम विस्फोट पछि कुनै ठूलो आक्रमण भएको छैन। सो आक्रमणमा ४५ विदेशी नागरिक सहित २७९ जनाको मृत्यु भएको थियो। इस्लामिक स्टेटसँग सम्बन्धित एक स्थानीय समूहले उक्त आक्रमणको जिम्मा लिएको थियो। त्यसपछि पर्यटक सङ्ख्यामा तीव्र गिरावट आएको थियो ।

तर, अन्तर्राष्ट्रिय मुद्रा कोष (IMF) द्वारा प्रदान गरिएको आर्थिक राहतपछि श्रीलङ्काको अर्थतन्त्रमा केही सुधार आएको छ र हाल पर्यटकहरूको आगमन पुनः बढ्न थालेको छ।

अमेरिकी दूतावासको हालैको चेतावनीपछि श्रीलङ्काको सरकारले देशभरका पर्यटक गन्तव्यहरूको सुरक्षाका लागि नयाँ योजना सार्वजनिक गर्ने जनाएको छ। प्रहरी गुप्तचर निकायहरूसँग समन्वय गरी पर्यटकहरूको सुरक्षालाई प्राथमिकतामा राखेर सुरक्षा बलहरूलाई परिचालन गरिने बताइएको छ। साथै, पर्यटकहरूले कुनै पनि सुरक्षासम्बन्धी चिन्ताहरूका बारेमा जानकारी दिनका लागि एक हटलाइन पनि स्थापना गरिएको छ।

[AFP Inputs]