संस्कृति, पर्यटन तथा नागरिक उड्यनमन्त्री बद्री पाण्डेले गणतन्त्र चीनका विश्वप्रसिद्ध वैज्ञानिक प्राध्यापक विङडिङलाई सम्मान गरेका छन्। सुदूरपश्चिम विश्वविद्यालयको सक्रियतामा जलवायु परिवर्तन, ऊर्जा र स्वास्थ्यसम्बन्धी १६ देशका वैज्ञानिकहरूको सहभागितामा काठमाडौमा आयोजित गोष्ठीको समापनमा मन्त्री पाण्डेले उनलाई अभिनन्दन गरेका हुन्।
 

मन्त्री पाण्डेले गोष्ठीमा जलवायु परिवर्तन, ऊर्जा र स्वास्थ्यका समस्याहरूको समाधान र पर्यटन प्रवर्द्धनका विषयमा गुणस्तरीय छलफल भएकोमा कृतज्ञता व्यक्त गरे। उनले नेपाल र चीनबीचको पुरानो आदान–प्रदानको इतिहासलाई सम्झाउँदै चौथो शताब्दीमा बौद्ध भिक्षु फाहियानको नेपाल आगमन र लुम्बिनीको इतिहासको उत्खननमा गरिएको अतुलनीय योगदानको पनि उल्लेख गरे।
 

मन्त्री पाण्डेले सुदूरपश्चिम विश्वविद्यालयलाई नेपालको विकासको अनुसन्धान केन्द्रको रूपमा स्थापित गर्न चिनियाँ विश्वविद्यालय र सरकारसँग सहयोग गर्न अनुरोध गरे। साथै, उनले कोरियाली र चिनिया नागरिकलगायत अन्य सहभागीहरूलाई नेपालको प्राकृतिक र सांस्कृतिक धरोहरलाई अनुभव गर्न नेपाल भ्रमण गर्न पनि आमन्त्रित गरे।
 

कार्यक्रममा प्राध्यापक विङडिङले नेपालीहरूलाई आत्मीय र सहयोगी बताए र नेपाली विद्यार्थीहरूलाई अध्ययन र अनुसन्धानमा आफ्नो साथमा लिने इच्छा व्यक्त गरे। उनका मातहतमा ११४ जना विद्यार्थी विद्यावारिधि गर्दै छन्।