परिवारसँगको विवादपछि घरबाट निस्किएकी एक नेपाली युवती भारतमा बलात्कारको शिकार भएकी छन्। सिलगुडी हुँदै बिहारको राजधानी पटना पुगेकी ती युवतीलाई एक भारतीय बस चालकले दुई दिनसम्म बलात्कार गरेको भारतीय सञ्चारमाध्यमहरूले जनाएका छन्।

आरोपित बस चालकले ती युवतीलाई रोजगारीको प्रलोभन देखाएर आफूसँग लगेका थिए। त्यसपछि दुई दिनसम्म बलात्कार गर्नुका साथै युवतीसँग भएको नगद रकम र मोबाइलसमेत लुटेको भारतीय समाचार रिपोर्टहरूमा उल्लेख छ।

गान्धी मैदानस्थित बस स्ट्यान्डनजिक रुँदै बसेको अवस्थामा भेटिएकी ती युवतीलाई त्यहाँ रहेका नेपाली समुदायका व्यक्तिहरूले उद्धार गरेका थिए। उनीहरूले पीडितलाई स्थानीय प्रहरी कार्यालय पुर्‍याएर उजुरी दर्ता गराएका हुन्।

पीडित युवतीको बयानका आधारमा प्रहरीले आरोपित चालकको खोजी थालेको जनाइएको छ।

भारतीय सञ्चारमाध्यमका अनुसार ती युवती घरमा सौतेनी आमाको निरन्तर दवाबमा थिइन्। रोजगारी गर्न बाध्य बनाएको भन्दै उनी चार दिनअघि घर छाडेर हिँडेको जनाइएको छ। यद्यपि, ती युवतीको नाम, उमेर वा ठेगाना भने गोप्य राखिएको छ।

अहिले भारतीय प्रहरीले अनुसन्धान सुरु गरिसकेको र घटनाका दोषीमाथि कारबाही प्रक्रिया अघि बढाइने अपेक्षा गरिएको छ। नेपाली पक्षबाट पनि आवश्यक कूटनीतिक पहल र पीडितको उद्धार तथा पुनर्स्थापना प्रक्रियामा सक्रियता देखाउनुपर्ने देखिन्छ।