टी–२० विश्वकप एसिया तथा इस्ट एसिया–प्यासिफिक छनोट प्रतियोगितामा नेपालले जापानलाई पराजित गरेको छ।
ओमानमा शुक्रबार सम्पन्न खेलमा टस हारेर बलिङ गरेको नेपालले जापानलाई १३१ रनमै रोकेको थियो । त्यसपछि १३२ रनको लक्ष्य नेपालले १८ ओभरमै ५ विकेट गुमाउँदै पूरा गरेको छ ।
नेपालका ओपनर आशिफ शेखले ३८ रनको योगदान दिए भने कुशल भुर्तेलले २१ रन जोडे। गुल्सन झाले अविजित २८ रन प्रहार गर्दै टोलीलाई जितसम्म पुर्याएका थिए ।
बलिङतर्फ जापानका शोमा स्लेटरले २ विकेट लिए। यसअघि जापानले निर्धारित २० ओभरमा ८ विकेटको क्षतिमा १३१ रन बनाएको थियो। कप्तान केन्डेल काडोवाकी फ्लेमिङले ६० तथा इसाम रहमानले ३१ रनको योगदान दिए।
नेपालका बलर सन्दीप लामिछाने र ललित नारायण राजवंशीले समान २–२ विकेट लिएका थिए ।
जारी प्रतियोगितामा नेपालको यो दोस्रो जित हो। यसअघि नेपालले कुवेतलाई पराजित गरेको थियो। नेपाल यो खेलअघि नै सुपर सिक्स चरणमा प्रवेश गरिसकेको छ।
तपाईको प्रतिक्रिया दिनुहोस