विश्वकप फुटबलमा हरेक गोलको आफ्नै महत्व र कथा हुन्छ, तर मोरक्कोविरुद्ध नेदरल्याण्ड्सका फरवार्ड कोडी गाक्पोले गरेको गोल खेलको नतिजाभन्दा धेरै माथि थियो। आफ्नो व्यक्तिगत जीवनको ठुलो बज्रपात र पीडालाई छातीमा लुकाएर मैदान उत्रिएका गाक्पो गोल गरेलगत्तै मैदानमै भक्कानिएका छन्।

विश्वकपको ‘राउन्ड अफ ३२’ अन्तर्गत मन्टेरेमा भएको रोमाञ्चक खेलको ७२ औँ मिनेटमा गोल गर्दै गाक्पोले नेदरल्याण्ड्सलाई सुरुवाती अग्रता दिलाएका थिए। गोल गर्ने बित्तिकै उनी आफ्ना भावनाहरूलाई नियन्त्रण गर्न नसकेर मैदानमै धरधरी रोए।

डच फरवार्ड गाक्पो यतिबेला निकै गहिरो पारिवारिक पीडाबाट गुज्रिरहेका छन्। उनकी पार्टनर नोआ भान डर बिजले गत शनिबार मात्रै आफ्नो गर्भमा रहेको शिशु (सन्तान) गुमाएकी थिइन्। सन्तानवियोगको ताजा र असह्य पीडा मनमा बोकेर राष्ट्रका लागि मैदान उत्रिएका गाक्पोले गोल गरेपछि मैदानमा टाउको राखेर आँसु बगाएका थिए।

क्रिसेन्सियो समरभिलको पासमा गोल प्रहार गर्ने क्रममा मोरक्कोका खेलाडीसँग ठोक्किएर उनी भुइँमा लडिसकेका थिए। तर, जब उनी उठेर गोल भएको निश्चित भयो, उनको आँखाबाट खसिरहेका आँसु विश्वभरका लाखौँ दर्शकले प्रत्यक्ष प्रसारणमा स्पष्ट देख्न सक्थे। यो गोल गाक्पोका लागि केवल खेलको अग्रता मात्र नभई, उनका दिवंगत छोराप्रतिको एउटा भावपूर्ण र आर्तनादयुक्त श्रद्धाञ्जली बनेको थियो।

यद्यपि, खेलको अन्तिम नतिजा भने गाक्पो र नेदरल्याण्ड्सका लागि सुखद रहेन। खेलमा पुनरागमन गर्दै मोरक्कोले बराबरी गोल फर्कायो र निर्धारित तथा थप गरिएको समयमा अन्य गोल हुन सकेन। अन्ततः पेनाल्टी सुटआउटमा नेदरल्याण्ड्सलाई स्तब्ध पार्दै मोरक्कोले अघिल्लो चरणको यात्रा तय गर्‍यो। नेदरल्याण्ड्स विश्वकपबाट बाहिरिए पनि गाक्पोको यो भावुक क्षण विश्वकप इतिहासकै एउटा मर्माहत तस्बिरका रूपमा रहनेछ।