अमेरिकी मध्यस्थतामा भएको युद्धविराम सम्झौताको शर्तअनुसार हमासले थप दुई इजरायली बन्धकका शव इजरायललाई हस्तान्तरण गरेको छ। बाँकी शव फिर्ता गर्न हमासले थप समय मागेको बताइएको छ।

हमासको सशस्त्र शाखाले बाँकी बन्धकहरूको शव पत्ता लगाउन र फिर्ता गर्न विशेष उपकरण आवश्यक पर्ने बताएको छ। हमासको यो प्रतिक्रिया अमेरिकी राष्ट्रपति डोनाल्ड ट्रम्पले सम्झौताको पालना नभए इजरायली सेनाले गाजामा पुनः आक्रमण सुरु गर्न सक्ने चेतावनी दिएको समयमा आएको हो।

इजरायली प्रधानमन्त्री कार्यालयले जारी गरेको विज्ञप्तिमा रेडक्रसमार्फत बन्धकहरूको शव भएको कफिन प्राप्त भएको पुष्टि गर्दै तिनीहरूको आधिकारिक पहिचान प्रक्रिया चलिरहेको जनाएको छ।

जनतालाई संवेदनशीलता देखाउन र पहिचानको औपचारिक परिणाम नआएसम्म प्रतीक्षा गर्न आग्रह गर्दै सरकारले मृतक बन्धकहरूको परिवारलाई सबैभन्दा पहिले जानकारी दिने जनाएको छ।

गाजा शान्ति योजनाको पहिलो चरण अन्तर्गत हमासले कुल २८ बन्धकका शव फिर्ता गर्नु पर्ने शर्त छ। बुधबार राति फिर्ता गरिएका दुई शव इजरायली बन्धककै भएको पुष्टि भए, इजरायललाई फिर्ता गरिएका शवहरूको संख्या नौ पुग्नेछ।