पश्चिम एसियामा जारी युद्धले अमेरिकी हवाई शक्तिलाई गम्भीर धक्का दिएको छ। हालै इस्लामिक रिभोलुशनरी गार्ड कर्प्स (आईआरजीसी)ले खसालेको भनिएको अमेरिकी एफ - १५ लडाकु विमानको भग्नावशेष सार्वजनिक भएपछि युद्धमा नष्ट भएका अमेरिकी सैन्य विमानको संख्या सात पुगेको पुष्टि भएको छ।

इरानी सञ्चारमाध्यमले सार्वजनिक गरेको तस्बिरमा देखिएको भग्नावशेष अमेरिकी हवाई बलको एफ - १५ विमानसँग मिल्दोजुल्दो देखिन्छ। पछिल्ला घटनामा एउटा एफ - १५ र अर्को ए - १० विमान नष्ट भएपछि अमेरिकी हवाई क्षति अझै बढेको छ।

यसअघि मार्च २ मा कुवेतको हवाई रक्षा बलले झुक्किएर गरेको प्रहारमा अमेरिकाका तीन वटा एफ - १५ विमान खसालेका थिए। ती विमानमा रहेका छ चालकदललाई सुरक्षित रूपमा उद्धार गरिएको थियो। अमेरिकी रक्षा मन्त्री पिट हेग्सेथले ती पाइलटहरू पुनः कारबाहीमा फर्किएको बताएका छन्।

मार्च १२ मा केसी - १३५ विमान दुर्घटनामा अमेरिकी हवाई बलका ६ सदस्यको मृत्यु भएको थियो। अमेरिकी सेनाले यो घटना शत्रु आक्रमण नभई अर्को विमानसँगको संलग्नताका कारण भएको स्पष्ट गरेको छ।

मार्च २७ मा अमेरिकी ई - ३ विमान ध्वस्त हुँदा कम्तीमा १० जना सैनिक घाइते भए। यसबाहेक, एफ - ३५ फाइटर जेटलाई इरानी आक्रमणको आशङ्का गरिएको क्षतिपछि मध्यपूर्वस्थित अमेरिकी एयर बेसमा आपतकालीन अवतरण गराइएको थियो।