अमेरिकाको केन्द्रीय गुप्तचर निकाय सीआईएका पूर्व वरिष्ठ अधिकारी डेभिड रस ठूलो परिमाणमा सुन, नगद र महँगा घडीसहित पक्राउ परेका छन्।

अमेरिकी संघीय अनुसन्धान ब्युरो (एफबीआई) ले भर्जिनियास्थित उनको निवासमा छापा मार्दा ४ करोड डलरभन्दा बढी मूल्यका ३०३ वटा सुनका बिस्कुट बरामद गरेको जनाएको छ। प्रत्येक बिस्कुट करिब एक किलो तौलको रहेको बताइएको छ।

छापामार कारबाहीका क्रममा घरबाट २० लाख डलर नगद र ३५ वटा महँगा रोलेक्स घडीसमेत जफत गरिएको छ। अदालतमा पेश गरिएका दस्ताबेजअनुसार रसले सन् २०२५ नोभेम्बरदेखि २०२६ मार्चसम्म सरकारी कामको खर्च शीर्षकमा ठूलो परिमाणमा सुन र विदेशी मुद्रा लिएको आरोप छ।

सीआईएले उक्त सम्पत्तिको स्रोत र हिसाब फेला पार्न नसकेपछि आन्तरिक अनुसन्धान सुरु गरेको थियो। त्यसपछि सीआईएका निर्देशक जोन र्याटक्लिफको सिफारिसमा एफबीआईले मे १९ मा रसलाई पक्राउ गरेको जनाइएको छ।

रसविरुद्ध सार्वजनिक धन हिनामिना, झूटो विवरण पेश गरी सरकारी जागिर लिएको तथा नक्कली सैन्य बिदा प्रयोग गरेर भत्ता बुझेको आरोप लगाइएको छ। हाल उनी हिरासतमा रहेका छन् भने यसै साता अदालतमा मुद्दाको प्रारम्भिक सुनुवाइ हुने बताइएको छ।