चिनियाँ राष्ट्रपति सी जिनपिङ आगामी साता उत्तर कोरियाको दुर्लभ राजकीय भ्रमणमा जाने भएका छन्। चिनियाँ सरकारी सञ्चार माध्यम सिन्ह्वाका अनुसार राष्ट्रपति सीले आगामी सोमबारदेखि सुरु हुने दुई दिने भ्रमणका क्रममा उत्तर कोरियाली सर्वोच्च नेता किम जोङ उनसँग कूटनीतिक वार्ता गर्नेछन्। उत्तर कोरियाको सरकारी समाचार संस्था केसीएनएले पनि यस भ्रमणको पुष्टि गरेको छ।

सन् २०१९ पछि सीको यो पहिलो प्योङयाङ भ्रमण हो। यसलाई बेइजिङ र प्योङयाङबीचको ऐतिहासिक तर उतारचढावपूर्ण सम्बन्धलाई थप सुदृढ बनाउने कडीका रूपमा हेरिएको छ। यो सन् २०२६ मा राष्ट्रपति सीको पहिलो विदेश भ्रमण समेत हो।

हालैका महिनाहरूमा सीले बेइजिङमा अमेरिकी राष्ट्रपति डोनाल्ड ट्रम्प र रुसी राष्ट्रपति भ्लादिमिर पुटिनसहित विश्वका शक्तिशाली नेताहरूलाई स्वागत गरिसकेका छन्। विश्लेषकहरूका अनुसार यो उत्तर कोरिया भ्रमणले सीलाई क्षेत्रीय तथा अन्तर्राष्ट्रिय राजनीतिमा एक प्रभावशाली 'शक्ति सन्तुलनकर्ता' (पावर ब्रोकर) का रूपमा स्थापित गर्नेछ।

भ्रमणको समयलाई लिएर चीनले अमेरिका र उत्तर कोरियाबीच रोक्किएको संवाद पुनः सुरु गराउन मध्यस्थकर्ताको भूमिका खेल्न खोजेको हुनसक्ने अड्कलबाजी समेत भइरहेको छ। ट्रम्पले आफ्नो पहिलो कार्यकालमा किमसँग तीन पटक भेटवार्ता गरे पनि उत्तर कोरियाको आणविक कार्यक्रम बन्द गराउने प्रयास असफल भएको थियो।

यसैबीच, उत्तर कोरियाले आफ्नो आणविक क्षमता विस्तारलाई तीव्रता दिइरहेको छ। हालै मात्र नेता किमले आणविक सामग्री उत्पादन गर्ने नयाँ कारखानाको निरीक्षण गर्दै देशको आणविक हतियार 'घातीय दर' (एक्सपोनेन्सियल रेट) मा बढाउने घोषणा गरेका थिए।

चीन, उत्तर कोरियाको सबैभन्दा ठूलो आर्थिक साझेदार र प्रमुख कूटनीतिक समर्थक हो। यद्यपि, उत्तर कोरियाको आणविक महत्वाकांक्षा र लगातारको हतियार परीक्षणले क्षेत्रीय अस्थिरता बढाउने चिन्ताका कारण बेइजिङ सधैँ सतर्क रहँदै आएको छ। पछिल्ला वर्षहरूमा प्योङयाङ र मस्कोबीचको बढ्दो सामीप्यताका कारण चीन–उत्तर कोरिया सम्बन्ध केही चिसिएको अनुमान गरिएको थियो।

यस्तो अवस्थामा सीको यो भ्रमणलाई चीनले उत्तर कोरियामाथि आफ्नो गुम्दै गएको प्रभाव पुनः स्थापित गर्ने र सम्बन्धलाई सन्तुलनमा ल्याउने रणनीतिक प्रयासका रूपमा हेरिएको छ। यो भ्रमण दुई देशबीच सन् १९६१ मा भएको 'मैत्री, सहयोग तथा पारस्परिक सहायता सन्धि' को ६५औँ वार्षिकोत्सवको अवसरमा हुन लागेको हो, जुन चीनको इतिहासमै एकमात्र पारस्परिक रक्षा सन्धि (म्युचुअल डिफेन्स ट्रिटी) मानिन्छ।