संयुक्त राज्य अमेरिकाले भिसा प्रक्रियामा ठूलो फेरबदल गर्दै नयाँ 'भिसा बन्ड पाइलट कार्यक्रम' (Visa Bond Pilot Program) को घोषणा गरेको छ। यो नयाँ नियमले केही विशिष्ट भिसा आवेदकहरूको प्रक्रियामा उल्लेख्य परिवर्तन ल्याउने अमेरिकी दाबी छ।

यो कार्यक्रम विशेषगरी भिसा अन्तर्वार्तापछि कन्सुलर अधिकारीद्वारा योग्य ठहरिएका तर निश्चित सर्त (ग्यारेन्टी) आवश्यक पर्ने आवेदकहरूको हकमा लागु हुने जनाइएको छ।

यसरी काम गर्नेछ नयाँ प्रणालीले:
३० दिनभित्र भुक्तानीको सर्त: भिसा अन्तर्वार्ता सफलतापूर्वक सम्पन्न भई योग्य ठहरिएपछि, कन्सुलर अधिकारीले आवेदकलाई बन्ड (धरौटी) रकम भुक्तानी गर्न सीधा लिङ्कसहितको विस्तृत निर्देशन उपलब्ध गराउनेछन्। आवेदकले उक्त बन्ड रकम निर्देशन प्राप्त भएको ३० दिनभित्र अनिवार्य रूपमा भुक्तानी गरिसक्नुपर्नेछ।

३ महिने एकल-प्रवेश भिसा: बन्ड भुक्तानी गरेपछि आवेदकले अधिकतम ३ महिनाको अवधिका लागि मात्र मान्य हुने 'सिंगल-एन्ट्री' (एकल-प्रवेश) भिसा प्राप्त गर्नेछन्।

हवाई मार्गको बाध्यता: यो भिसा पाउनेहरूले अनिवार्य रूपमा संयुक्त राज्य अमेरिकाका व्यापारिक हवाई प्रवेश नाकाहरू (Commercial Airports) मार्फत मात्र अमेरिका प्रवेश गर्नुपर्नेछ।

सर्त पूरा गरे रकम फिर्ता
यो कार्यक्रमको सबैभन्दा महत्त्वपूर्ण पक्ष भनेको धरौटी रकम फिर्ता हुनु हो। अमेरिका भ्रमण सकेर स्वदेश फर्किएपछि यदि भिसाका सबै सर्तहरू पूर्ण रूपमा पालना भएको देखिएमा धरौटी रकम फिर्ता हुनेछ।

सर्तहरू: अमेरिकामा रहँदा गैरकानुनी रूपमा काम नगरेको र तोकिएको समयभित्रै अमेरिका छोडेको (प्रस्थान गरेको) खण्डमा धरौटी रकम स्वचालित रूपमा रद्द भई भुक्तानी गरिएको रकम आवेदकलाई फिर्ता गरिनेछ।

नेपालस्थित अमेरिकी दूतावासका अनुसार यो कार्यक्रमले भिसा प्रक्रियालाई थप व्यवस्थित बनाउने र भिसा नियमहरूको पालना सुनिश्चित गर्नेछ। यससम्बन्धी थप विस्तृत जानकारीका लागि अमेरिकी दूतावासको आधिकारिक वेबसाइट वा कन्सुलर विभागमा सम्पर्क गर्न सकिने दूतावासले जनाएको छ।