अमेरिकी राष्ट्रपति डोनाल्ड ट्रम्पको पछिल्लो अभिव्यक्तिपछि अन्तर्राष्ट्रिय बजारमा कच्चा तेलको मूल्य उकालो लागेको छ भने अमेरिकी सेयर बजारमा दबाब देखिएको छ।

आइतबार फक्स न्युजसँगको अन्तर्वार्तामा राष्ट्रपति ट्रम्पले इरानसँगको वार्ता असफल भए अमेरिकाले पुनः सैन्य कारबाही गर्न सक्ने संकेत दिएका थिए। साथै, विश्व ऊर्जा आपूर्तिका लागि अत्यन्त महत्वपूर्ण मानिने स्ट्रेट अफ होर्मुजमा थप नियन्त्रण कायम गर्ने विषयमा समेत उनले धारणा व्यक्त गरेका थिए। ट्रम्पको उक्त अभिव्यक्तिपछि ऊर्जा बजारमा तत्काल प्रतिक्रिया देखिएको हो।

उनको टिप्पणी सार्वजनिक भएसँगै ब्रेन्ट कच्चा तेलको मूल्य १.३५ प्रतिशतले बढेर प्रतिव्यारेल ८१.६६ अमेरिकी डलर पुगेको छ। यस्तै, अमेरिकी कच्चा तेल (डब्लुटिआई) को मूल्य २.४ प्रतिशतले वृद्धि हुँदै प्रतिव्यारेल ७७.६६ डलर पुगेको छ।

अमेरिका र इरानबीच जारी कूटनीतिक प्रयासका क्रममा होर्मुज क्षेत्रको सुरक्षा, लेबनानको युद्धविराम तथा इरानको आणविक कार्यक्रमबारे छलफल भइरहेको छ। यद्यपि, आइतबारको वार्ता निष्कर्षमा पुग्न नसके पनि संवाद प्रक्रिया जारी रहेको एक अमेरिकी अधिकारीले बताएका छन्।

यसबीच ट्रम्पले वार्ता असफल भए सो क्षेत्रबाट आवतजावत गर्ने जहाजहरूमा शुल्क लगाउने सम्भावनाबारे पनि धारणा सार्वजनिक गरेका छन्। हाल दुवै पक्षबीच भएको अस्थायी समझदारीअनुसार निश्चित अवधिसम्म जलमार्ग सञ्चालनमा अवरोध नगर्ने सहमति रहेको बताइएको छ।

भूराजनीतिक तनाव बढ्दै जाँदा ऊर्जा बजारमा आपूर्ति प्रभावित हुन सक्ने चिन्ता बढेको छ। विश्लेषकहरूका अनुसार वार्ता सफल भई ढुवानी पूर्ववत् अवस्थामा फर्किए तेल बजारमा आपूर्ति उल्लेख्य रूपमा बढ्न सक्छ।

अमेरिकी अटोमोबाइल एसोसिएसन (AAA) का अनुसार आइतबार अमेरिकामा पेट्रोलको औसत मूल्य प्रतिग्यालेन ३.९४ डलर रहेको थियो। यो एक महिनाअघिको तुलनामा कम भए पनि क्षेत्रीय तनाव सुरु हुनुअघिको अवस्थाभन्दा अझै उच्च रहेको जनाइएको छ।

उता, राजनीतिक अनिश्चितता र मध्यपूर्वको बढ्दो तनावले अमेरिकी सेयर बजारलाई पनि प्रभावित पारेको छ। डाउ जोन्स फ्युचर्स र एस एन्ड पी ५०० फ्युचर्स दुवै ०.४ प्रतिशतले घटेका छन् भने नास्डाक फ्युचर्स ०.६ प्रतिशतले ओरालो लागेको छ।