अमेरिकामा एकै समयमा भएका दुई छुट्टाछुट्टै गोलीबारीका घटनाले सार्वजनिक सुरक्षा र बन्दुक हिंसामाथिको बहसलाई पुनः गम्भीर रूपमा उठाएको छ। 

भर्जिनिया स्टेट युनिभर्सिटीमा शनिबार बिहान भएको गोलीबारीमा पाँच जना घाइते भएका छन् भने मिसिगनमा शुक्रबार भएका हिंसात्मक घटनामा १६ वर्षीय किशोरसहित पाँच जनाको ज्यान गएको छ। घटनालगत्तै फरार रहेका संदिग्ध आक्रमणकारी पनि मृत अवस्थामा फेला परेका छन्। दुवै घटनाको अनुसन्धान जारी रहे पनि गोलीबारीको यकिन कारण भने अहिलेसम्म खुल्न सकेको छैन।

भर्जिनिया स्टेट युनिभर्सिटीको क्वाड एनेक्सेसनजिकै शनिबार बिहान भएको उक्त आक्रमणमा छात्रावासबाहिर पाँच जनालाई गोली लागेको अवस्थामा भेटिएको थियो। क्याम्पस प्रहरी र चेस्टरफिल्ड काउन्टीका अधिकारीहरूले घाइते सबैलाई तत्काल अस्पताल पुर्‍याएका थिए। घाइतेमध्ये एक जनाको अवस्था गम्भीर रहे पनि अन्यको ज्यानको जोखिम नरहेको अधिकारीहरूले बताएका छन्। विश्वविद्यालयले घाइतेमध्ये कम्तीमा एक जना विद्यार्थी रहेको पुष्टि गरेको छ, जो उपचारपछि डिस्चार्ज भइसकेका छन्। घटनालगत्तै क्याम्पसमा केही समय लकडाउन गरिएको थियो भने नयाँ शैक्षिक सत्र सुरु हुन केही दिनअघि घटेको यो घटनाले विद्यार्थी र अभिभावकमा चिन्ता बढाएको छ।

यसैबीच, मिसिगनको मिसॉकी काउन्टीमा शुक्रबार भएको अर्को गोलीबारीमा ५ सर्वसाधारण र एक संदिग्ध आक्रमणकारीसहित ६ जनाको मृत्यु भएको छ। प्रहरीले एउटा घरबाट १६ वर्षीय किशोर, ४५ वर्षीय पुरुष र ४० वर्षीया महिलाको शव फेला पारेको छ भने सोही स्थानमा गम्भीर घाइते भएकी १३ वर्षीया बालिका भने बाँच्न सफल भएकी छिन्। 

त्यसपछि अन्य स्थानमा थप दुईजनाको शव भेटिएको थियो भने व्यापक खोजीका क्रममा जंगल क्षेत्रमा संदिग्ध आक्रमणकारी चाड हिकम्यान र एक महिलाको पनि शव फेला परेको छ। प्रहरीका अनुसार सन् २०२४ मा बालबालिकासँग सम्बन्धित मुद्दामा दोषी ठहर भएका हिकम्यानको आपराधिक पृष्ठभूमिको पनि अनुसन्धान भइरहेको छ। यी दुवै घटनाले अमेरिकामा कडा बन्दुक नियन्त्रण कानुनको आवश्यकतालाई फेरि एकपटक प्रखर रूपमा उजागर गरेका छन्।