युरोपेली सङ्घ (ईयू) को कडा दबाबपछि पेय पदार्थ उत्पादन गर्ने विश्वप्रसिद्ध बहुराष्ट्रिय कम्पनीहरू कोका–कोला, नेस्ले र ड्यानोनले आफ्ना प्लास्टिक बोतलमा प्रयोग गरिएका रिसाइक्लिङसम्बन्धी दाबीहरू परिमार्जन गर्न सहमति जनाएका छन्। 

युरोपेली आयोगले बिहीबार जानकारी गराएअनुसार, नोभेम्बर २०२३ मा युरोपेली उपभोक्ता समूहहरूले यी कम्पनीका बोतलबन्द पानीमा भ्रमपूर्ण वातावरणमैत्री दाबी गरिएको भन्दै आपत्ति जनाएपछि भएको छलफलमा कम्पनीहरू बोतलका शब्दावली बदल्न सहमत भएका हुन्।

सहमतिअनुसार अब कम्पनीहरूले यसअघि प्रयोग गर्दै आएको ‘म शतप्रतिशत रिसाइकल गरिएको प्लास्टिकबाट बनेको बोतल हुँ’ भन्ने नाराको सट्टा ‘यो बोतल शतप्रतिशत रिसाइकल गरिएको छ, बिर्को र लेबलबाहेक’ भन्ने स्पष्ट सन्देश राख्नुपर्नेछ। यसबाट बोतलको बिर्को र लेबल पनि रिसाइकल भइसकेको हो कि भन्ने भ्रम हट्ने अपेक्षा गरिएको छ। त्यसैगरी, ‘मलाई फेरि रिसाइकल गर्नुहोस्’ भन्ने सन्देशलाई हटाएर ‘मलाई रिसाइकल गर्नुहोस्’ मात्र लेखिनेछ, जसले उपभोक्तामा उक्त बोतल पहिले नै रिसाइकल भइसकेको छ भन्ने गलत धारणा उत्पन्न हुन दिनेछैन।

ईयूका २७ सदस्य राष्ट्रका उपभोक्ता संरक्षण निकायहरूसँगको समन्वयमा भएको यस सम्झौतापछि कम्पनीहरूले आफ्ना अनलाइन तथा डिजिटल प्रचार अभियानमा पनि सोही अनुरूप पारदर्शी वातावरणीय दाबी प्रस्तुत गर्नुपर्नेछ। आयोगका अनुसार कोका–कोला र नेस्लेले आफ्ना डिजिटल अभियानमा केही प्रतिबद्धताहरू कार्यान्वयनसमेत गरिसकेका छन्। ईयूको यस कदमलाई प्लास्टिकजन्य फोहोर र 'ग्रीनवाशिङ' (झूटा वातावरणमैत्री दाबी) विरुद्ध पारदर्शिता बढाउने एउटा महत्त्वपूर्ण प्रयासका रूपमा हेरिएको छ।