देशका विभिन्न स्थानमा भएका छुट्टाछुट्टै चारवटा सवारी दुर्घटनामा परी पाँच जनाको ज्यान गएको छ। सुनसरी, मकवानपुर, तनहुँ र अर्घाखाँची जिल्लामा भएका यी दुर्घटनाहरूमा मोटरसाइकल, बस, अटो र कार/गाडीको ठक्कर तथा अनियन्त्रित गतिले गर्दा ठूलो मानवीय क्षति भएको प्रहरीले जनाएको छ।

सुनसरीको इटहरी उपमहानगरपालिका-४ हलगडामा बसले मोटरसाइकललाई ठक्कर दिँदा मोटरसाइकल चालक ६२ वर्षीय छत्र बहादुर भण्डारीको विराटनगरस्थित नोवेल अस्पतालमा उपचारका क्रममा मृत्यु भएको छ भने सोही दुर्घटनामा घाइते भएका अर्का एक व्यक्तिको उपचार भइरहेको छ। 

यस्तै, मकवानपुरको बकैया गाउँपालिका-५ श्रीपुरमा अटो अनियन्त्रित भई पल्टिँदा अटोमा सवार ४५ वर्षीय सन्त बहादुर माझीको हेटौँडा अस्पतालमा उपचारका क्रममा ज्यान गएको छ।

त्यसैगरी, तनहुँको ब्यास नगरपालिका-१ मुसेखोलामा गाडीको ठक्करबाट अन्दाजी ४२ वर्षीय एक पुरुष पैदलयात्रीको प्रदेश अस्पताल दमौलीमा उपचारका दौरान मृत्यु भएको छ भने मृतक लगायतको पहिचान खुलाउने प्रयास भइरहेको छ। 

अर्घाखाँचीको भुमिकास्थान नगरपालिका-२ मा भएको मोटरसाइकल दुर्घटनामा पिता-पुत्रको नै ज्यान गएको छ। उक्त दुर्घटनामा ६२ वर्षीय देविराम आचार्य र उनका २३ वर्षीय छोरा बिवेक आचार्यको मृत्यु भएको हो। चाडपर्व तथा यातायातको चापसँगै बढ्दो दुर्घटनालाई मध्यनजर गर्दै प्रहरीले यी सबै घटनाका सम्बन्धमा आवश्यक अनुसन्धान गरिरहेको छ।