अमेरिकी राष्ट्रपति डोनाल्ड ट्रम्पले बुधबार ओभल अफिसमा दक्षिण अफ्रिकी समकक्षी सिरिल रामाफोसासँगको भेटका क्रममा एक विवादास्पद भिडियो प्ले गरेर वातावरणलाई अप्रत्याशित रूपमा तनावपूर्ण बनाएका छन्  । उनले उक्त भिडियोमार्फत दक्षिण अफ्रिकामा श्वेत मानिसहरू, विशेषतः किसानहरू, विरुद्ध नरसंहार भइरहेको दावी गरेका थिए ।

ट्रम्पले पत्रकारहरूको उपस्थितिमा एक ठूलो स्क्रिनमा चार मिनेट लामो भिडियो देखाउँदै दक्षिण अफ्रिकाका केही राजनीतिज्ञहरूले श्वेत किसानहरूलाई निशाना बनाएको तर्क गरे । “तपाईंले उनीहरूलाई जमिन लिन अनुमति दिनुहुन्छ, र त्यसपछि उनीहरूले श्वेत किसानहरूलाई मार्छन्,” ट्रम्पले टिप्पणी गरे । उनले ‘मृत्यु, मृत्यु, मृत्यु – भयानक मृत्यु’ भनेर भिडियोको प्रभाव अझ प्रष्ट पारे।

तर, ट्रम्पद्वारा प्रस्तुत गरिएको समाचार क्लिपमध्ये एकमा कङ्गोको तस्बिर समेत समावेश थियो, जसले उनको दाबीको तथ्यपरकता प्रति प्रश्न उठाएको छ ।

दक्षिण अफ्रिकी राष्ट्रपति रामाफोसा सुरुमा स्तब्ध भए पनि संयमित रहे । उनले उक्त भिडियोमा देखाइएका व्यक्तिहरू सत्तारूढ दलका नभई विपक्षी दलका भएको बताए । साथै, उनले हालैको विवादास्पद जग्गा कब्जा कानुनका नाममा श्वेत किसानहरूबाट जबर्जस्ती जग्गा लिएको भन्ने आरोप अस्वीकार गरे ।

“होइन, होइन, होइन – कसैले पनि जमिन लिन सक्दैन,” रामाफोसाले प्रतिक्रिया दिए ।

उक्त भेटलाई दुबै देशबीच बिग्रँदो सम्बन्ध सुधार गर्ने अवसरको रूपमा हेरिएको थियो । ट्रम्पका दक्षिण अफ्रिकामा जन्मेका सहयोगी एलन मस्क पनि ओभल अफिसमै उपस्थित थिए । मस्क ‘श्वेत नरसंहार’ सन्देशको प्रचारकको रूपमा चिनिन्छन् ।

रामाफोसा अमेरिकी राष्ट्रपति ट्रम्पलाई ‘मनाउने’ उद्देश्यसहित दक्षिण अफ्रिकाका प्रख्यात गल्फरहरू अर्नी एल्स र रेटिफ गुसेनलाई साथ लिएर ह्वाइट हाउस पुगेका थिए । तर, भिडियो प्ले भइरहँदा ट्रम्पले बारम्बार रामाफोसाको बोल्ने प्रयासलाई रोक्दै भिडियो हेर्नमा जोड दिएका थिए ।

भिडियोमा दक्षिण अफ्रिकी विपक्षी नेता जुलियस मालेमालाई ‘बोअरलाई मार, किसानलाई मार’ भनिरहेको देखाइएको थियो, जुन रंगभेदी शासनकालमा प्रचलित नारा थियो । अन्त्यमा मारिएका किसानहरूको सम्झनामा सडक छेउमा राखिएका सेता क्रसहरूको दृश्य देखाइएको थियो, जसलाई ट्रम्पले चिहान ठाने ।

उक्त गम्भीर कुराकानीका बीच रामाफोसाले “हामीलाई नेल्सन मण्डेलाले सिखाउनुभएको थियो, समस्याबारे टेबल वरिपरि बसेर कुराकानी गर्नुपर्छ,” भन्दै शान्तिपूर्ण वार्ताको आग्रह गरे ।

दुई गल्फरहरू एल्स र गुसेनले पनि स्थितिलाई शान्त पार्ने प्रयास गरे । एल्सले “हामी हाम्रो देशमा सबै कुरा राम्रो होस् भन्ने चाहन्छौं,” भनेका थिए ।

भेटपछि रामाफोसाले संवादलाई "ठूलो सफलता" भने र आगामी नोभेम्बरमा जोहानेसबर्गमा हुने जी–२० शिखर सम्मेलनमा ट्रम्पको सहभागिताको अपेक्षा व्यक्त गरे । उनले ट्रम्प उक्त भिडियोमा देखाइएको नरसंहारमा पूर्ण विश्वास गर्दैनन् भन्ने विश्वाससमेत व्यक्त गरे । “अन्ततः, मलाई लाग्छ उहाँको मनमा शङ्का र अविश्वास छ,” उनले पत्रकारहरूलाई भने।

ट्रम्प प्रशासनले दक्षिण अफ्रिकासँगको सम्बन्धमा कठोर नीति अपनाउँदै आएको छ – जसअन्तर्गत गाजामा इजरायलविरुद्धको मुद्दामा दक्षिण अफ्रिकाको अन्तर्राष्ट्रिय न्यायालयमा प्रस्तुत गुनासोको आलोचना, विदेशी सहायता कटौती, उच्च भन्सार घोषणा र राजदूत निष्कासनजस्ता कदमहरू सामेल छन्।